LalBaughcha Raja Ganpati Festival : सध्या सर्वत्र गणेशोत्सवाची धामधूम पाहायला मिळत आहे. मुंबईत मोठमोठे गणपती, आकर्षक सजावट पाहण्यासाठी भाविक जात असतात. मुंबईतील लालबागच्या राजाच्या चरणी नतमस्तक होण्यासाठी भाविक रात्र रात्र रांगा लावतात. बरं. इतक्या रांगा लावूनही लालबागच्या राजाचे दर्शन होईलच याची शाश्वती नाही. या सगळ्यात चांदी आहे ती VVP लोकांची. सामान्य भक्त १८ ते २० तास रांगेत उभे असतात, तर याउलट VVP रांगांमधून काही माणसं केवळ अर्ध्या तासात दर्शन घेऊन बाहेरही पडतात. हे कितपत योग्य आहे, असा प्रश्न विचारावा वाटतो?, पण तो कोणाला?. अनेक कलाकार, दिग्गज मंडळी, कमिटी मेंबरचे नातेवाईक यांच्यासाठी सहज दर्शन आहे.
या सगळ्या वादावादीत एका भाविकाने शेअर केलेला एक व्हिडीओ तुफान व्हायरल होत आहे. यांत लालबागच्या राजाच्या सेवकासह त्या भाविकाचा वाद झाल्याचं पाहायला मिळत आहे. याचा व्हिडीओ त्याने इंस्टाग्राम अकाउंटवर शेअर करत असं म्हटलं आहे की, “लालबागचा राजा खरंच गरीबांचा राजा राहिला का फक्त VVIP चाच? मुंबईतील लालबागचा राजा हा देशभरातील भाविकांसाठी आस्था आणि श्रद्धेचं केंद्र आहे. प्रत्येक वर्षी लाखो भाविक दर्शनासाठी रांगा लावतात. ‘गरिबांचा राजा’ ही ओळख असलेल्या या गणेशोत्सव मंडळाबद्दल आता प्रश्न उपस्थित होऊ लागले आहेत”.
आणखी वाचा – “ट्रोलिंग करणं सगळ्यात सोपी गोष्ट”, प्रथमेश परबच्या पत्नीचा ‘तो’ व्हिडीओ व्हायरल, म्हणाली, “खूप गरजेचं आणि…”
पुढे त्याने लिहिलं आहे की, “भाविकांचं म्हणणं आहे की, तिथले काही स्वयंसेवक अत्यंत उद्धट, अकार्यक्षम आणि अहंकारी वर्तन करतात. रांगेत उभ्या असलेल्या सामान्य भक्तांना कारणाविना धक्के दिले जातात, त्यांच्याशी अयोग्य भाषेत वागलं जातं. दुसरीकडे, “VIP आणि VVIP” लोकांना सहज दर्शन मिळतं, तर तासंतास रांगेत थांबलेल्या भक्तांना अपमानास्पद वागणूक सहन करावी लागते. त्यामुळे हा खरंच गरिबांचा राजा आहे का, की फक्त श्रीमंत आणि सत्ताधाऱ्यांसाठीचा?, असा प्रश्न भक्तांच्या मनात निर्माण झाला आहे”.
शेवटी त्याने म्हटलं, “लालबागचा राजा हा सर्वांचा आहे. त्याच्या दर्शनात भेदभाव, उद्धटपणा किंवा फक्त VVIP साठी विशेष वागणूक देणं हे भक्तांच्या श्रद्धेला धक्का देणारं आहे. प्रशासनाने आणि मंडळाने तातडीने लक्ष देऊन भक्तांना योग्य तो सन्मान, सुविधा आणि सुरक्षितता दिली पाहिजे, हीच सर्वांची अपेक्षा आहे”.
