दक्षिण सिनेविश्वातून नुकतीच एक धक्कादायक बातमी समोर येत आहे. ज्येष्ठ अभिनेत्रीला त्यांच्या मुलाने दारूसाठी मारहाण केली असून या मारहाणीत अभिनेत्रीचा मृत्यू झाला असल्याची माहिती मिळत आहे. या अभिनेत्रीचं नाव कसम्मल असून त्यांनी अनेक दाक्षिणात्य चित्रपटात महत्वपूर्ण भूमिका साकारल्या होत्या. कसम्मल यांचा मुलगा पी. नमाकोडी याने त्यांना दारूसाठी मारहाण केली आणि या मारहाणीत त्यांचं राहत्या घरीच निधन झालं आहे. कसम्मल व त्यांचा मुलगा पी. नमाकोडी यांच्यात दारूच्या पैशावरून भांडण सुरू झाले. मुलाने केलेल्या मारहाणीत अभिनेत्रीचा ४ फेब्रुवारी रोजी पहाटे ३ वाजता जागीच मृत्यू झाला.
‘न्यूज 18’च्या वृत्तानुसार, कसम्माला मारण्यासाठी त्यांच्या मुलाने लाकडी दांड्याचा वापर केला आणि त्यातच त्यांचा मृत्यू झाला. मदुराई शहरातील उसिलमपट्टीजवळील अनैयुरमध्ये ही घटना घडली. घटनेनंतर, उसिलमपट्टी तालुका पोलिसांनी या प्रकरणात हस्तक्षेप केला आणि त्यानंतर ज्येष्ठ अभिनेत्रीचा मृतदेह शवविच्छेदनासाठी शासकीय रुग्णालयात नेण्यात आला. अधिकाऱ्यांनी जप्त केलेल्या खुनाच्या शस्त्रासह नमाकोडीला अटक करून पोलीस कोठडी देण्यात आली आहे. अभिनेत्री कसम्मल व त्यांचा पती बालासमी यांना एकूण चार मुले आहेत.
आणखी वाचा – “पूर्वीपेक्षा अधिक…”, अखेर पतीबरोबर घटस्फोट घेण्याबाबत अंकिता लोखंडे स्पष्टच बोलली, म्हणाली, “आमचं नातं…”
कसम्मल यांचा मुलगा गेल्या १५ वर्षांपासून आपल्या पत्नीपासून विभक्त होऊन अभिनेत्री कसम्मल यांच्याबरोबर राहत होता. या काळात त्याला दारूचे व्यसन लागले. दारूच्या व्यसनामुळे त्याने आईकडे वारंवार पैशाची मागणी सुरू केली. त्यादिवशीही नामकोडीने आईकडे दारूसाठी पैसे मागितले. मात्र त्यांनी पैसे देण्यास नकार दिल्यामुळे त्याने आईला मारहाण केली आणि या मारहाणीत अभिनेत्रीला आपला जीव गमवावा लागला.
दरम्यान, त्यांच्या कामाबद्दल बोलायचे झाले तर त्यांनी अनेक दाक्षिणात्य चित्रपटात महत्वपूर्ण भूमिका साकारल्या होत्या. कसम्मल २०२२ मध्ये प्रदर्शित झालेल्या तामिळ चित्रपट ‘कदैसी विवसयी’ मध्ये दिसल्या होत्या. एम. मणिकंदानी दिग्दर्शित या चित्रपटात नलांदी, विजय सेतुपती व योगी बाबू प्रमुख भूमिकेत होते. कसम्मलने यांनी या चित्रपटात सेतुपतीच्या आईची भूमिका साकारली होती.