Anant Ambani-Radhika Merchant Pre Wedding in Jamnagar : मागील वर्षीपासूनच भारतातील सर्वात श्रीमंत उद्योगपती मुकेश अंबानी यांचा धाकटा मुलगा अनंत अंबानी व विरेन मर्चंट यांची मुलगी राधिका मर्चंट यांच्या लग्नाची धूम पाहायला मिळत आहे. नुकतेच गुजरातमधील जामनगर येथे दोघांच्याही लग्नाआधीचे कार्यक्रम मोठ्या दिमाखात पार पडले. या कार्यक्रमासाठी जगभरातील अनेक दिग्गजांनी हजेरी लावली होती. तीन दिवस चाललेल्या या कार्यक्रमामध्ये हॉलिवूड पॉपस्टार रिहानाच्या गाण्यांचाही कार्यक्रम आयोजित करण्यात आला होता. भारतात पहिल्यांदाच आल्याने रिहाना अतिशय भारावलेलीही दिसली. याचबरोबर मायक्रोसॉफ्टचे सह-संस्थापक बिल गेट्स, फेसबुकचे संस्थापक मार्क झुकरबर्ग,अदाणी समुहाचे गौतम अदाणी यांनी आवर्जून उपस्थिती लावली होती.
पण या सर्वामध्ये अधिक लक्ष वेधले ते बॉलिवूड कलाकारांनी. बॉलिवूडमधील जेष्ठ अभिनेते अमिताभ बच्चन, जया बच्चन, ऐश्वर्या राय-बच्चन,शाहरुख खान, गौरी खान, आमिर खान, सलमान खान, रणबीर कपूर, आलिया भट्ट, रणवीर सिंह, दीपिका पदुकोण अशा अनेक मंडळींनी हजेरी लावली होती. तीन दिवसाचे सर्व सोहळे अतिशय आनंदात पार पडले. मुकेश अंबानी व नीता अंबानी यांचा खास परफॉर्मन्स, राधिकाची ग्रँड एंट्री, रिहानाचा परफॉर्मन्स या सर्व सोहळ्याचे व्हिडीओ प्रचंड व्हायरल झाले आहेत. अशातच आता सलमान व अनंत यांचा एक मजेशीर व्हिडीओ व्हायरल होताना दिसत आहे.
या व्हायरल झालेल्या व्हिडीओमध्ये एकॉनचा परफॉर्मन्स सुरू असताना अनंत सलमानला उचलण्याचा प्रयत्न करत आहे. पण त्याचा हा प्रयत्न अपयशी ठरतो आणि तो सलमानला उचलू शकत नाही आणि ते दोघेही हसतात. त्यानंतर तिथे सलमानचा बॉडीगार्ड तिथे येतो आणि सलमानला उचलून घेतो. हे बघून एकॉन मंचावरच जोरात ओरडू लागतो. हे बघून अनंत खूप खुश होतो. सलमान व अनंतचा हा मजेशीर व्हिडीओ खूप व्हायरल होत आहे. यामध्ये सलमान, शेरा व अनंत यांच्यातील घट्ट मैत्री पाहायला मिळत आहे.
राधिका व अनंत यांच्या तीन दिवस सुरू असलेल्या कार्यक्रमामध्ये थीमचे आयोजन करण्यात आले होते. हॉलिवूड पॉपस्टार रिहानाबरोबरच प्रसिद्ध पंजाबी गायक दिलजित दोसांज, बॉलिवूड गायक अरिजित सिंह, श्रेया घोषाल यांचेही विशेष कार्यक्रम झाले. सर्वांनीच या सोहळ्याचा आनंद लुटला.
