अभिनेत्री सीमा देव यांनी त्यांच्या सोज्वळ व्यक्तिमत्वाने सिनेसृष्टीत चांगलीच छाप पाडली. ऐंशी, नव्वदीच्या काळ गाजवणारे या अभिनेत्रीच आज २४ ऑगस्ट रोजी निधन झालं आहे. पती रमेश देव यांच्या निधनानंतर त्या खचल्याने आजारी होत्या. अशातच आज त्यांच्या निधनाची बातमी समोर आली. आणि संपूर्ण सिनेसृष्टीवर शोककळा पसरली. अनेक कलाकार मंडळींनी पोस्ट शेअर करत सीमा देव यांना श्रद्धांजली वाहिली. अशातच सीमा यांच्या लोकप्रियतेचा एक किस्सा सांगत हेमांगी कवी हिने देखील सोशल मीडियावरून पोस्ट शेअर केली आहे. (Hemangi Kavi On Seema Deo)
सीमा देव यांच्या निधनानंतर पोस्ट शेअर करत हेमांगीने लिहिलं, ‘लहानपणी दूरदर्शनवर ‘सुवासिनी’ लागला होता. अभ्यास संपवून मी जेव्हा बाहेरच्या खोलीत आले (तेव्हा १ रूम किचन मोठी गोष्ट होती) त्यातलं ‘ह्रदयी प्रीत जागते’ गाणं सुरू होतं! एक अतिशय सालस, सोज्वळ, सुसंस्कृत, सादगी से भरा, गोड चेहरा मी पाहीला. मी लगेच बाबांना विचारलं ‘ही कोण पप्पा?'”
“(आपण सर्रास पडद्यावर दिसणाऱ्या लोकांना अरे, तु रे करूनच संबोधतो, वयात कितीही अंतर असलं तरी) तर पप्पा म्हणाले ‘सीमा.’ मी म्हणाले ‘पप्पा किती सुंदर दिसते ओ ही!’ मला चित्रांची आवड असल्यामुळे पुढे म्हटलं ‘बाईचा परफेक्ट चेहरा!’ त्यावर पप्पा म्हणाले’“हो न अगदी बायको मटेरियल!’ भाजी निवडता निवडता मम्मीने पप्पांकडे पाहीलं त्यावर ते म्हणाले ‘एकदम तुझ्या मम्मीसारखा!’ पप्पा वाचले”.
“गंमतीचा भाग सोडा तेव्हा खरंच ‘जगाच्या पाठीवर’, ‘या सुखांनो या’, ‘मोलकरीण’, ‘आनंद’ मधल्या सीमासारख्या बाईशी आपलं लग्न व्हावं असं प्रत्येक पुरूषाला वाटत असणार! रमेश देव नशीबवान! पण ते ही तेवढेच देखणे! म्हणजे प्रत्येक बाईच्या हसबँड मटेरियलमध्ये चपखल बसणारा चेहरा! दोघांची जोडी तर म्हणजे रब ने बना दी जोडीच जणू! मागच्या वर्षी रमेश देव गेले…आज सीमा देव!”
“खरे जोडीदार एकमेकांशिवाय फार कळ वेगळे राहू शकत नाहीत हेच खरं! सीमा देव यांनी एका चित्रपटात खलनायिकेची भूमिका केली होती. कमाल अभिनय. त्यांच्या सोज्वळ, गोड भूमिकेपेक्षा अतिशय वेगळा! म्हणजे अशा चेहऱ्याची बाई असं ही वागू शकते बरं का याचं ते उत्तम उदाहरण!’ हेमांगीची ही पोस्ट सध्या चाहत्यांमध्ये व्हायरल होतेय”.
