dharmendra health updates : बॉलिवूड अभिनेते धर्मेंद्र यांच्या तब्येतीबाबत मोठी अपडेट समोर आली आहे. आज सकाळपासून त्यांच्या निधनाच्या अफवा सर्वत्र पसरल्या होत्या. मात्र, त्यांच्या निधनाच्या या अफवांवर कुटुंबीयांनी पोस्ट शेअर करत भाष्य केलं. या अफवा खोट्या ठरवत धर्मेंद्र यांची पत्नी हेमा मालिनी आणि मुलगी ईशा देओलने पोस्ट शेअर केली. दोघीनींही त्यांच्या तब्येतीत सुधारणा होत असल्याचं स्पष्ट केलं आणि खोट्या अफवा पसरवू नका अशी विनंती केली. तसेच कुटुंबाच्या प्रायव्हसीचा आदर करा अशी विनंतीही केली. तर हेमा मालिनी यांनी पतीच्या निधनाची पोस्ट पाहताच राग व्यक्त केला.
यानंतर आता हेमा मालिनी आणि ईशा देओल ब्रीच कँडी रुग्णालयात पोहोचल्या आहेत. वरिंद्र चावलाने शेअर केलेल्या पोस्टमध्ये दोघीही एकाच गाडीतून हॉस्पिटलमध्ये गेल्याच पाहायला मिळत आहे. यादरम्यान, हॉस्पिटल बाहेरची सुरक्षा अधिक केली असल्याचं चित्र दिसतंय. धर्मेंद्र यांची भेट घेण्यासाठी पत्नी आणि लेक हॉस्पिटलमध्ये पोहोचली असल्याचं दिसतंय, त्यामुळे अर्थात त्यांच्या निधनाच्या बातम्या खोट्या असल्याचं स्पष्ट होतंय.
आणखी वाचा – ९ सेमी ट्यूमर आणि किडनी स्टोन; दीपिका कक्करवर उपचार सुरु, २२% यकृताचा भागही काढला, डॉक्टरांनाही बसला धक्का
गेले १२ दिवस धर्मेंद्र मुंबईतील ब्रीच कँडी रुग्णालयात उपचार घेत होते. मात्र गेल्या २ दिवसांत त्यांची प्रकृती अधिक खालावली. काल त्यांना श्वास घेण्यास त्रास होत होता तेव्हा त्यांना व्हेंटिलेटरवर शिफ्ट करण्यात आले. सोमवारी रात्री (१० नोव्हेंबर) देओल कुटुंबीयांसह सलमान खान, शाहरुख खान, आर्यन खान, अमीषा पटेल, गोविंदा हे सेलिब्रिटी सुद्धा ब्रीच कँडी रुग्णालयात पोहोचले होते. यावेळी अभिनेत्री अमीषा पटेलला अश्रू अनावर झाल्याचं पाहायला मिळालं होतं.
आणखी वाचा – धर्मेंद्र यांच्या निधनाचे वृत्त खोटं, लेक इशा देओल आणि पत्नी हेमा मालिनीने दिली माहिती, वाचा सविस्तर
सध्या देओल कुटुंबीयांनी प्रायव्हसीचा आदर करून खोट्या बातम्या पसरवू नका अशी विनंती सर्वांना केली आहे. “जे घडत आहे ते अक्षम्य आहे. जबाबदार चॅनेल्स उपचारांना प्रतिसाद देत असलेल्या आणि हळूहळू बरे होणाऱ्या व्यक्तीबद्दल खोट्या बातम्या कशा पसरवू शकतात? हे अत्यंत अनादरपूर्ण आणि बेजबाबदार वर्तन आहे. कृपया कुटुंबाचा आणि त्यांच्या गोपनीयतेच्या गरजेचा आदर करा”, असं हेमा मालिनी यांनी पोस्ट करत संताप व्यक्त केला.
