गेल्या काही वर्षांपासून बॉलिवूड कलाकारांवर हल्ला होण्याचे तसेच धमक्या मिळण्याचे प्रमाण खूप वाढले आहे. गेल्या वर्षी सलमान खानच्या घरावर बिश्नोइ गॅंगने गोळीबार केला होता. त्याच्या घराच्या बाल्कनीवर बंदुकीच्या गोळ्यादेखील सापडल्या होत्या. याआधीदेखील अनेकदा सलमानला जीवे मारण्याच्या धमक्या मिळाल्या होत्या. त्यानंतर अभिनेता शाहरुख खानलाही धमक्या मिळाल्या होत्या. अशातच गुरुवारी पहाटे तीन वाजताच्या सुमारास अभिनेता सैफ अली खानवर राहत्या घरी हल्ला झाला. या हल्ल्यामध्ये सैफ गंभीर जखमी झाला. मुंबईतील लीलावती रुग्णालयात त्याच्यावर सध्या उपचार सुरु आहेत. त्याच्या उपचार करणाऱ्या डॉक्टरांनी तो आता सुखरूप असल्याच्या सांगितले आहे. (saif ali khan news)
सैफवर झालेल्या हल्ल्यानंतर आता शाहरुखच्या घराबाहेर रेकी केल्याचे वृत्तदेखील समोर येत आहे. ‘आज तक’च्या माहितीनुसार,सैफच्या घरामध्ये घुसण्याआआधी चोराणी १४ जानेवारी २०२५ रोजी शाहरुखच्या घराची रेकी केली होती. मात्र ‘टाइम्स नाऊ’बरोबर साधलेल्या संवादामध्ये यामध्ये काहीही तथ्य नसल्याचे सांगितले आहे. तसेच आता पोलिसांनी ३५ जणांची टीम करुन वसई, नालासोपारा या ठिकाणी आरोपींचा शोध सुरु आहे. दरम्यान सैफच्या हल्लेखोराचा कह चेहरा सीसीटीव्हीमध्ये कैद झाला आहे.
दरम्यान सैफवर झालेल्या हल्ल्यानंतर पूजा भट्टने मुंबईमध्ये सुरक्षित वाटत नसल्यासंदर्भात भाष्य केले होते. तसेच कायदा व सुव्यवस्था यावरदेखील प्रश्न उपस्थित केले आहेत. या सगळ्यावर मुख्यमंत्री देवेंद्र फडणवीस यांनी भाष्य केले आहे. ते म्हणाले की, “देशाची आर्थिक राजधानी सुरक्षित करण्यासाठी सरकार पावले उचलणार आहे. मला वाटते की, देशातील मोठ्या शहरांमधील मुंबई हे सर्वात सुरक्षित शहर आहे. काही वेळा अशा घटना घडतात हे खरे आहे आणि त्या गांभीर्याने घ्यायला हव्यात. पण अशा घटनांमुळे मुंबई असुरक्षित आहे, असे म्हणणे योग्य नाही. यामुळे मुंबईची प्रतिमा मलिन होत आहे. पण शहर सुरक्षित करण्यासाठी सरकार नक्कीच प्रयत्न करेल”.
मुंबई पोलिसांच्या मते, संशयित आरोपीला वांद्रे रेल्वे स्टेशन येथे बघितले गेले आहे. त्याचा तपास आता सर्वत्र सुरु आहे. अभिनेत्याच्या घरी आता तलवार मिळाली आहे. मात्र ही तलवार जुनी असलेली दिसून येत आहे. याचा आता तपास सुरु आहे. ही तलवार कदाचित सैफच्या घरातीलच असू शकते. मात्र कुटुंबाने अजून याबद्दल कोणतीही माहिती दिली नाही.
