हिंदी चित्रपटसृष्टीतील ज्येष्ठ अभिनेता बॉबी देओल बऱ्याच वर्षांपासून चर्चेत नव्हता. गेल्यावर्षी प्रदर्शित झालेल्या ‘ॲनिमल’ या चित्रपटामुळे तो चर्चेत आला. या चित्रपटातून बॉबी हिंदी सिनेसृष्टीत दमदार कमबॅक केलं असं म्हणणं चुकीचं ठरणार नाही. ‘ॲनिमल’ चित्रपटाच्या अफाट यशानंतर आणि बॉबी देओलच्या अभिनयाच्या अनेक बातम्या रंगल्या. दरम्यान, बॉबी देओलच्या नुकत्याच समोर आलेल्या एका व्हिडीओने साऱ्यांचं लक्ष वेधून घेतलं आहे. समोर आलेल्या व्हिडीओमध्ये बॉबी देओल दोन गरीब मुलांना पैसे देताना दिसत आहे. (Bobby Deol Viral Video)
बॉबी देओलचा समोर आलेला व्हिडीओ हा सोशल मीडियावर तुफान व्हायरल होत आहे. याशिवाय, चाहतेही त्याच्या या व्हिडीओला भरभरुन पसंती दर्शविताना दिसत आहेत. बॉबी देओल हा त्याच्या साध्या राहणीमानासाठी आणि उदारतेसाठी प्रसिद्ध आहे. अशातच समोर आलेला हा व्हिडीओ त्याच्या स्वभावाचा खात्रीशीर पुरावा आहे.
पापाराझींद्वारे बॉबीचा एक लेटेस्ट व्हिडीओ सोशल मीडियावरून समोर आला आहे. या व्हिडीओमध्ये असे पाहायला मिळत आहे की, बॉबीला दोन गरीब मुलांनी घेरले आहे, जे त्याच्याकडे काही पैसे मागत आहेत. यादरम्यान अभिनेता खिशातून ५०० रुपयांच्या दोन नोट काढतो आणि या दोन लहान मुलांना देतो, त्यानंतर त्यांच्या चेहऱ्यावर आनंद पाहायला मिळतो. दोन्ही मुलं वस्तू विक्री करत असतात, ते बॉबीला त्या वस्तू विकत घेण्यासाठी सांगतात, मात्र बॉबी त्या वस्तू विकत न घेता त्यांना मदत करतो.
एवढेच नाही तर बॉबी देओलने या दोन मुलांबरोबर फोटोही क्लिक केलेले पाहायला मिळत आहेत. या व्हिडीओवर कमेंट करत चाहते या अभिनेत्याला रिअल लॉर्ड बॉबी अशी उपाधी देत आहेत आणि त्याचे खूप कौतुक करत आहेत. दिग्दर्शक संदीप रेड्डी वंगा यांच्या ‘ॲनिमल’ या चित्रपटानंतर बॉबी देओल ‘कांगुवा’ या चित्रपटात दिसणार आहे. या सिनेमात त्याच्याबरोबर साऊथचा सुपरस्टार सूर्या दिसणार आहे. नुकताच ‘कांगुवा’चा धमाकेदार टीझरही प्रदर्शित झाला आहे, जो पाहून चाहत्यांमध्ये या साऊथ चित्रपटाची उत्सुकता वाढली आहे.
