स्टार प्रवाह वहिनी अनेक मराठी मालिका प्रेक्षकांचे चांगले मनोरंजन करत आहेत. अशातच प्रेक्षकांच्या आणखी मनोरंजनासाठी स्टार प्रवाह वाहिनीवर आणखी एक नवीन मालिका प्रेक्षकांच्या भेटीला येणार आहे. पूजा बिरारी आणि विशाल निकम यांची प्रमुख भूमिका असलेली ‘येड लागलं प्रेमाचं’ ही नवीन मालिका प्रेक्षकांच्या भेटीला येणार आहे. या मालिकेच्या पहिल्या दोन्ही प्रोमोंना प्रेक्षकांचा भरभरून प्रतिसाद मिळाला होता. आता याच्या तिसऱ्या प्रोमोत प्रेक्षकांना एका नवीन अभिनेत्याची झलक पाहायला मिळत आहे.
येत्या २७ मे पासून रात्री १० वाजता स्टार प्रवाहवर सुरु होणाऱ्या ‘येड लागलं प्रेमाचं’ या मालिकेविषयी प्रेक्षकांमध्ये कमालीची उत्सुकता आहे. मालिकेच्या प्रोमोमध्ये राया आणि मंजिरी म्हणजेच अभिनेता विशाल निकम आणि अभिनेत्री पूजा बिरारी यांची झलक पहायला मिळाली. त्यानंतर आता लवकरच मालिकेतील आणखी एक महत्त्वाचं पात्र म्हणजेच इन्स्पेक्टर जय घोरपडे प्रेक्षकांच्या भेटीला येणार आहे आणि ही भूमिका बिग बॉस मराठी फेम जय दुधाणे हा अभिनेता साकारत आहे.
आणखी वाचा – शुक्रवारी मेष व मकरसह ‘या’ राशींचे भाग्य उजळणार, तुमच्या नशिबात नेमकं काय?, जाणून घ्या…
मालिकेचा हा नवीन प्रोमो सध्या सर्वांचेच लक्ष वेधून घेत आहे. मालिकेत जय दुधाणे हा हुशार व कर्तबगार पोलिस अधिकारी दाखवला असला तरी तो तितकाच लाचखाऊ असल्याचं या प्रोमोमधून पाहायला मिळत आहे. त्यामुळे छोट्या पडद्यावरील ‘बिग बॉस मराठी’ या लोकप्रिय शोमधून एकत्र दिसलेली विशाल व जयची जोडी आता पुन्हा एकदा मालिकेतून प्रेक्षकांचे मनोरंजन करायला सज्ज झाली आहे.
मालिकेच्या या नवीन प्रोमोला प्रेक्षकांसह मराठी कलाकारांनीही लाईक्स व कमेंट्स करत चांगलाच प्रतिसाद दिला आहे. मेघा धाडे, रेश्मा शिंदे यांसह अनेक कलाकारांनी प्रोमोखाली कमेंट्सद्वारे या मालिकेविषयी उत्सुकता दर्शवली आहे. तसेच विशाल-जय यांचे अनेक चाहतेही या जोडीला पुन्हा एकदा टीव्हीवर एकत्र पाहण्यासाठी आतुर असल्याचे कमेंट्सद्वारे म्हटले आहे.