मनोरंजन विश्वातील अनेक कलाकार मंडळी ही त्यांच्याबरोबरचे धमाल किस्से, प्रसंगे किंवा घटना आपल्या चाहत्यांबरोबर शेअर करत असतात. शूटिंगच्या काही गंमतीजमतीही सोशल मीडियाद्वारे शेअर करत असतात. अशातच ‘बिग बॉस’ फेम अभिनेत्याने त्याच्या सोशल मीडियावर अक खास व्हिडीओ शेअर केला असून त्याचा हा व्हिडीओ चाहत्यांच्या चांगलाच पसंतीस उतरला आहे आणि हा लोकप्रिय अभिनेता म्हणजे अक्षय केळकर.
आपल्या स्टायलिश अंदाजामुळे कायमच चर्चेत असलेला हा अभिनेता त्याच्या सोशल मीडियावर चांगलाच चर्चेत राहत असतो. अशातच त्याने सोशल मीडियावर शेअर केलेला एक व्हिडीओ सध्या सर्वांचे लक्ष वेधून घेत आहे. अक्षय लवकरच त्याच्या आगामी ‘अबीर गुलाल’ या मालिकेतून प्रेक्षकांच्या भेटीला येत आहे आणि सध्या मालिकेचं चित्रीकरण सुरू आहे. यानिमित्ताने अक्षयने कोल्हापुरातील चित्रीकरणाचा एक अनुभव चाहत्यांबरोबर शेअर केला आहे. अक्षयने त्याच्या सोशल मीडियावर बैलगाडा चालवतानाचा एक व्हिडीओ शेअर केला आहे.
हा व्हिडीओ शेअर करत अभिनेत्याने असं म्हटलं आहे की, “तर हा बैलगाडा, शूटिंगचा भाग नव्हता. कोल्हापुरात ‘अबीर गुलाल’च्या शूटिंगसाठी गेलेलो असताना, सेटच्या जवळून एक दादा त्यांचा हा बैलगाडा घेऊन जात होते आणि खूप इच्छा झाली त्यावर बसायची. म्हणून त्यांना सहज विचारलं. मग काय कोल्हापूरची माणसं म्हणजे विषय आहे का? तर हौस पुरवून घेतली. कॉलेजमध्ये असताना बैलांचं, बैलगाड्याचं अनेकदा चित्र काढलं आहे आणि हा तर कसलाच हँडसम आहे.”
आणखी वाचा – अर्जुनची मैत्रीण त्याच्याच प्रेमात, प्रेमाची कबुलीही दिली, पुढे अप्पीचं काय होणार?
अक्षयने शेअर केलेल्या या व्हिडीओवर त्याच्या चाहत्यांनी अनेक कमेंट्स करत प्रतिसाद दिला आहे. “मस्त…आमचं कोल्हापूर आहेच भारी”, “बैलगाडीवर इतका बिनधास्त बसलेला माणूस मी पहिल्यांदा बघितला”, “जमलंय बर का”, “तू इतका साधा आहेस म्हणूनच तू नेहमी सर्वांच्या कौतुकास पत्र ठरतोस” अशा अनेक कमेंट्स करत अक्षयच्या चाहत्यांनी या व्हिडीओला तुफान प्रतिसाद दिला आहे.
दरम्यान, कलर्स वाहिनीवर ‘बिग बॉस’चे पर्व गाजवल्यानंतर अभिनेता पुन्हा एकदा त्याच्या अबीर गुलाल मालिकेतून प्रेक्षकांच्या भेटीला येत आहे. त्यामुळे त्याचे प्रेक्षक खूपच उत्सुक आहेत. ‘अबीर गुलाल’ या नव्या मालिकेत त्याच्याबरोबर अभिनेत्री गायत्री दातार आणि पायल जाधवही असणार आहेत. या मालिकेत अक्षय अगस्त्यची व्यतिरेखा साकारणार आहे