bigg boss marathi 6 updates : बिग बॉस मराठी’ सीझन ६ मध्ये रुचिता जामदार प्राजक्ता शुक्रेसह तिच्या घराबद्दल मनमोकळेपणाने बोलताना दिसत आहे. या संवादात रुचिता आपल्या कुटुंबाविषयी भावुक होताना पाहायला मिळते. रुचिता जामदार ही सुमारे ३६.८ हजार फॉलोअर्स असलेली एक सोशल मीडिया इन्फ्लुएन्सर आहे. रुचिता ‘रोडीज डबल क्रॉस’ची स्पर्धक, ‘डान्स महाराष्ट्र डान्स’ची विजेती आणि स्टार प्रवाहच्या ‘मी होणार सुपरस्टार’ची पहिली उपविजेती देखील होती. आता ‘बिग बॉस मराठी ६’मध्येही ती कल्ला करण्यासाठी सज्ज झाली आहे. अत्यंत गरीब परिस्थितीतून रुचिताने स्वतःच स्थान स्वतः बनवलं आहे.
नुकत्याच समोर आलेल्या प्रोमोमध्ये रुचिता तिच्या वडिलांच्या आठवणीत भावुक होते आणि भावाबद्दलही सांगताना दिसते. ती प्राजक्ता शुक्रेसह बोलताना म्हणते की, “पप्पांशी शेवटचं फोनवर बोलणं झालंच नाही”. यावर प्राजक्ता तिला विचारते, “का गं?”. त्यावर रुचिता म्हणते, “मी फोन करत होते, पण तो फोन त्यांना उचलता आलाच नाही…”. पुढे ती सांगते की तिचे वडील एका डिलिव्हरी मॅनचं काम करतात आणि त्या कामात ते सतत व्यस्त असतात. हे सांगताना रुचिताच्या डोळ्यांत पाणी येताना दिसतं.
आणखी वाचा – “पहिला कोंबडा भेटला”, काळू डॉन जमिनीवरच झोपला आणि कोंबडा आरवताच…; यावर सागर कारंडेने असं केलं की…
यानंतर प्राजक्ता रुचिताला विचारते, “तुझा भाऊ किती मोठा आहे?”. त्यावर रुचिता उत्तर देते, “तो माझ्यापेक्षा एक वर्षाने लहान आहे. त्याला क्रिकेट खेळायची खूप आवड होती.” प्राजक्ता पुन्हा विचारते, “खेळायची आवड होती म्हणजे” यावर रुचिता भावुक होत सांगते, “आमची परिस्थिती तशी नव्हती. क्रिकेट हा खूप खर्चिक खेळ आहे. माझं थोडंफार करिअर सुरू होतं, पण घरात एकाच जणावर खर्च करता येत होता. माझ्या लहान भावाला क्रिकेटमध्ये खूप पुरस्कार मिळाले आहेत, पण त्याने माझ्यासाठी खूप सॅक्रिफाईस केल,” असं म्हणत रुचिता ढसाढसा रडताना दिसते.
रुचिता जामदार तिच्या बेधडक स्वभावासाठी आणि स्पष्टवक्तेपणासाठी ओळखली जाते. बिग बॉसमध्ये एन्ट्री करताच रितेश देशमुखसोबत संवाद साधताना रुचिता म्हणाली, “छत्रपती शाहू महाराजांच्या कोल्हापूरची लेक आहे. छुईमुई बाहुली नाही तर वाघीण आहे. थेट अंबाबाईचा आशीर्वाद घेऊन आले आहे. त्यामुळे यावेळेस लढायला मजा येणार आहे”.
