गेल्या अनेक दिवसांपासून अनेक चाहत्यांना ‘बिग बॉस’च्या नवीन पर्वाची उत्सुकता लागून राहिली होती. ‘बिग बॉस’ मराठीच्या नवीन पर्वासाठी प्रेक्षकांची उत्सुकता शिगेला पोहोचली होती आणि हीच उत्सुकता आता पूर्ण होणार आहे. कारण ‘बिग बॉस’ मराठीचे पाचवे नवीन पर्व आता सुरु झाले आहे. यंदा ‘बिग बॉस मराठी’च्या होस्टिंगची जबाबदारी रितेश देशमुख सांभाळत आहेत. गेल्या काही दिवसांपासून यावर्षी स्पर्धक म्हणून घरात कोण प्रवेश करणार याबद्दल प्रेक्षकांच्या मनात उत्सुकता निर्माण झाली होती आणि अखेर या घरात स्पर्धकांची एंट्री झाली आहे.
आतापर्यंत दहा स्पर्धक घरात गेले असून यांची गेले काही दिवस सोशल मीडियावर चांगलीच चर्चा सुरु होती. या घरात आतापर्यंत वर्षा उसगांवकर, कोकण हार्टेड गर्ल अंकिता वालावलकर, अभिनेता निखिल दामले, विनोदी अभिनेते पॅडी कांबळे, कलर्स मराठीच्या दोन अभिनेत्री म्हणजेच योगीता चव्हाण व कीर्ती किल्लेकर यांची एंट्री झाली आहे. यानंतर ‘इंडियन आयडॉल’ फेम गायक अभिजीतने ‘बिग बॉस’च्या घरात प्रवेश केला आहे.
गायक अभिजीत सावंतसह या घरात आणखी दोन स्पर्धकांची एंट्री झाली आहे आणि यापैकी एक स्पर्धक म्हणजे छोटा पुढारी म्हणून लोकप्रिय असलेला घनश्याम दरवडे. तर दुसरी स्पर्धक परदेसी गर्ल इरिना रूडाकोवाने घरात प्रवेश केला आहे, तर निक्की तांबोळीनेही या घरात प्रवेश केला आहे.
अशातच आता घरात SplitsVilla चा स्टार अरबाज पटेल व बारामतीचा रांगडा गडी, वैभव चव्हाणने एंट्री केली आहे. यांच्याबरोबरच ‘हसल’सारखारॅप शो केलेली गायिका आर्या जाधवनेही घरात एंट्री केली आहे. तसेच कीर्तनकार पुरुषोत्तमदादा पाटील यांनीही बिग बॉसच्या घरात प्रवेश केला आहे. द्योजक ते फेमस रील स्टार असा प्रवास करणारा कोल्हापुरी गडी, धनंजय पोवार यांचीही बिग बॉसच्या घरात एन्ट्री झाली आहे.
दरम्यान, ‘बिग बॉस’ मराठीच्या नव्या पर्वाला धमाकेदार सुरुवात झाली असून हा नेत्रदीपक सोहळा प्रेक्षकांना कलर्स मराठी वाहिनीसह जिओ सिनेमावरही पाहता येणार आहे. रोज रात्री ९ वाजता ‘बिग बॉस मराठी’ हा शो बघता येणार आहे. २४ तास ड्रामा सुरु असणाऱ्या ‘बिग बॉस मराठी’च्या घरात यावर्षी काय घडणार हे पाहणं उत्सुकतेचं ठरेल.
