Bigg Boss Marathi 5 Update : बिग बॉस मराठी’च्या पाचव्या पर्वातील पहिला वीकेंड स्पेशल एपिसोड काल (३ ऑगस्ट) रोजी प्रसारित करण्यात आला. यंदाच्या पर्वात ‘बिग बॉस मराठीच्या चावडी’ ऐवजी प्रेक्षकांना ‘भाऊचा धक्का’ अशा नावाने वीकेंड स्पेशल एपिसोड दाखवण्यात आला. रितेश देशमुखने ‘भाऊच्या धक्क्या’वर दणक्यात एन्ट्री घेतली, पण तेवढाच दणका त्याने सर्व स्पर्धकांनाही दिला. या भागात ‘भाऊचा धक्का’चे खास गाणेही पहिल्यांदाच वाजवण्यात आले. हे गाणे ‘बिग बॉस मराठी’च्या माजी स्पर्धक उत्कर्ष शिंदेने तयार केले आहे. यंदाच्या पर्वाचा पहिलाच आठवडा गाजला तो निक्कीच्या वागणुकीमुळे. वर्षा व निक्की यांच्या भांडणात निक्कीने वर्षाताईंचा अपमान केल्यामुळे धक्क्यावर येताच रितेश देशमुखने सुरुवातीपासूनच निक्कीला लक्ष्य केल्याचं पाहायला मिळालं. (Nikki Tamboli apologized to Varsha Usgaonkar)
रितेशने असे म्हटले की, “पहिला आठवडा निक्कीविषयीच होता. एकतर निक्की बोलत होती किंवा तिच्याविषयी लोक बोलत होते. खेळाडू म्हणून तू कमाल आहेस, पण माणूस म्हणून तुझ्यात काहीतरी अडचण आहे. तुझी भाषा चुकीची आहे आणि वर्षा ताईंशी बोलण्याची तिची भाषा या घरात खपवून घेतली जाणार नाही”. यापुढे रितेशने निक्कीला सुनावले की, “असली भाषा या मंचावर सहन केली जाणार नाही”. पुढे वर्षा यांनीही निक्कीची भाषा अजिबात आवडली नसल्याचे म्हटले. निक्की व तिच्या गटाचा उल्लेख वर्षाताईंनी ‘महामंडळ’ असा केला. यापुढे रितेशने वर्षा यांनाही “त्या एखादा मुद्दा खूप चघळत बसतात, चिंगमसारख्या त्याच त्याच गोष्टीला चघळत बसता” असं म्हटलं. त्यानंतर अभिजीतही वर्षा ताईंबद्दल बोलताना भावुक झाला.
निक्कीने आर्याला “अशा मानसिकतेमुळे मी या शोमध्ये येणार नव्हते” असं म्हटलं होतं. त्यामुळे निक्कीने मराठी माणसाचा अपमान केल्याचे म्हणत रितेशने तिची चांगलीच शाळा घेतली. मराठी माणूसच शेवटी तिला ट्रॉफी जिंकण्यासाठी मदत करणार आहे, याची जाणीव रितेशने निक्कीला करुन दिली. या चुकीच्या विधानामुळे निक्कीने “आताच्या आता माझ्या मराठी माणसाची तुम्हाला माफी मागायला हवी” असे रितेशने सुनावले आणि त्यानंतर निक्कीने हात जोडून सर्वांची माफी मागितली. यामुळे तिला रडूही आले. त्यानंतर घरात जाऊन तिने पुन्हा एकदा वर्षाताईंची व इतर स्पर्धकांची वैयक्तिकपाने माफी मागितली.
दरम्यान, या भागात रितेशने घरातील इतर स्पर्धकांचाही चांगलंच पाणउतरा केला. रितेशने अंकिता प्रभू वालावलकरला ‘मराठी कार्ड’ वापरत असण्यावरुन झापले. इरिनाच्या जागी एका मराठी माणसाला स्थान मिळाले असते, या अंकिताच्या मुद्द्यावरुनही रितेशने तिला सुनावले. यानंतर त्याने पुरुषोत्तम दादा पाटील यांना ‘मिस्टर इंडिया’ म्हटले, तर योगिताला ‘मिसिंग इंडिया’ म्हटले. तसंच ‘बिग बॉस’च्या घरात एक प्रेक्षक म्हणून सगळं खेळ बघत असल्याचा टोमणा त्याने पॅडी कांबळेंना लगावला. जान्हवी आणि आर्याच्या कॅट फाइटवरुनही रितेशने दोघींनाही सुनावले. हात उचलला गेला तर घराबाहेर काढले जाईल असा इशाराच त्याने दिला.
