Bigg Boss Marathi 5 : ‘बिग बॉस मराठी’ हा एक असा शो आहे, जिथे सर्व भांडतात, वाद घालतात. पण अनेकदा ही मंडळी भावुकही होतात. असाच स्पर्धकांचा एक भावुक व्हिडीओ कलर्स मराठीच्या सोशल मीडिया अकाऊंटद्वारे शेअर करण्यात आला आहे. कलर्स मराठी वाहिनीने इन्स्टाग्रामच्या अधिकृत अकाउंटवर एक प्रोमो शेअर केला आहे. या प्रोमोमध्ये रितेश देशमुख ‘मी सगळ्या सदस्यांना खूप मोठं सरप्राइज देणार आहे’ असं म्हणत असल्याचे दिसत आहे. त्यानंतर तो ‘बिग बॉस’च्या घरात प्रवेश करतो. त्याला पाहताच सर्व सदस्य आनंदित होतात आणि त्याची गळाभेट घेतात. यानंतर रितेश “तुमच्यासाठी मी घरच इकडे आणतोय” असं म्हणतो. त्यामुळे या नवीन प्रोमोद्वारे स्पर्धकांची त्यांच्या घरच्यांशी भेट घडणार असल्याचे या प्रोमोमधून दिसत आहे. (Bigg Boss Marathi 5 New Promo)
या प्रोमोमध्ये अभिजीत सावंत, पंढरीनाथ कांबळे, जान्हवी किल्लेकर, धनंजय पोवार, निक्की तांबोळी, अरबाज पटेल, अंकिता वालावलकर, सूरज चव्हाण असे सर्वच सदस्य भावूक झालेले पाहायला मिळत आहे. या सदस्यांना रितेश देशमुख त्यांना धीर देत आहे. या प्रोमोमध्ये काही स्पर्धक आपल्या मुलांना बघून भावुक झाले आहेत तर काही आपल्या आई-वडिलांना बघून भावुक झाले आहेत. त्यामुळे एकंदरीच स्पर्धक आपल्या घरच्यांशी संवाद साधणार असल्याचे या नवीन प्रोमोमधून दिसत आहे. त्यामुळे आता हे स्पर्धक आणि त्यांचे कुटुंबिय यांच्यामध्ये नक्की काय बोलणे होणार? हे पाहणे उत्सुकतेचे असणार आहे. तसंच रितेश घरात आल्यानंतर स्पर्धक आणि त्याच्यामध्ये काय संवाद होणार? हे पाहणेही महत्वाचे ठरणार आहे.
‘बिग बॉस मराठी’च्या घरातील स्पर्धकांची जितकी चर्चा होते, तितकीच चर्चा या सीझनचे सूत्रसंचालन करणाऱ्या रितेश देशमुखचीही होताना दिसते. त्यामुळे प्रेक्षक भाऊच्या धक्क्याची आतुरतेने वाट पाहत असतात. भाऊचा धक्कामध्ये रितेश देशमुख चुकलेल्या स्पर्धकांची ‘शाळा’ घेतो आणि बरोबर खेळणाऱ्या सदस्यांना शाबासकी देतो. तसंच प्रत्येक एपिसोडमध्ये तो धक्का काही अनपेक्षित धक्केदेखील देतो. असाच एक भावुक धक्का आज रितेश सर्वांना देणार आहे.
दरम्यान, या आठवड्यात आर्या व निक्की तांबोळी यांच्यामध्ये मोठे भांडण झाल्याचे पाहायला मिळाले. या भांडणात आर्याने निक्कीच्या कानाखाली मारली होती. त्यामुळे सुरुवातीला तिला जेलमध्ये टाकण्याची शिक्षा देण्यात आली; मात्र अंतिम निर्णय भाऊच्या धक्क्यावर होईल, असं म्हटलं गेलं आणि त्यानुसार भाऊच्या धक्क्यावर आर्याला तिच्या या कृत्यासाठी घराबाहेर जाण्याची शिक्षा दिली गेली.
