Bigg Boss 17 Latest News : ‘बिग बॉस १७’ मध्ये अभिनेत्री अंकिता लोखंडे व सुप्रसिद्ध उद्योगपती विकी जैन यांनी एकत्र प्रवेश केला होता. या शोमध्ये आल्यापासून विकी व अंकिता दोघेही चर्चेत राहिले. दोघांमधील भांडण, प्रेम, मारामारी यांच्यामुळे ही जोडी नेहमीच चर्चेत राहिली. या शोमध्ये विकीचा खेळ सर्वांनाच खूप आवडला होता. ‘बिग बॉस’च्या घरातील प्रत्येक सदस्यासह त्याचे चांगले नाते निर्माण झाले होते. दरम्यान, या शोमध्ये विकी व अंकिता यांच्यात बराच वाद झाला होता. एकदा या शोमध्ये विकीने अंकितावर हात उचलण्याचाही प्रयत्न केला होता. ही व्हिडीओ क्लिप चांगलीच व्हायरल झाली होती.
आता शो संपल्यानंतर विकी जैनने त्याच व्हायरल घटनेवर मौन सोडले आहे. विकीने त्या घटनेबद्दल उघडपणे भाष्य केलेलं पाहायला मिळत आहे. अंकिताच्या पतीने विकीने नुकतीच ‘पिंकविला’ला मुलाखत दिली. या मुलाखतीत विकीने व्हायरल झालेल्या क्लिपबद्दल भाष्य केलं. त्याचा असा कोणताही हेतू नव्हता, क्लिपमध्ये ते चुकीचे दाखवण्यात आले असल्याचे त्याने म्हटलं आहे.
याबाबत बोलताना विकी म्हणाला, “जेव्हा मी ती क्लिप पाहतो तेव्हा ते कठोर हावभाव माझ्या डोळ्यासमोर दिसतात. पण सत्य हे आहे की, इतकं शिक्षण घेतल्यानंतर तुम्ही अशा टप्प्यावर पोहोचता की तुम्ही खूप स्थिर व्यक्ती बनता. अशी प्रतिक्रिया देण्यासाठी या गोष्टी आपल्या व्यवस्थेत नाहीत. शोमध्ये माझे सर्वांशी भांडण झाले होते पण मी कोणाशीही बोलताना अपशब्द वापरले नव्हते. मी नेहमीच आचारसंहितेचे पालन केले आहे. मी नेहमी माझ्या भावनांवर नियंत्रण ठेवतो आणि मी हे सिद्धही केले आहे” असंही तो म्हणाला.
त्या क्लिपबद्दल बोलताना विकी पुढे म्हणाला की, “मी चुकीचा असेन अशी मुळात ही परिस्थिती नव्हती. या हावभावाला काही अर्थ नव्हता. हे मला व अंकिताला माहीत आहे. आमचं नातं खूप घट्ट आहे. आम्हाला माहित आहे की, आम्ही कोणत्या परिस्थितीत होतो. त्यामुळे हा व्हायरल झालेला व्हिडीओ पुन्हा पाहण्याची वा एकमेकांना स्पष्टीकरण देण्याची आम्हाला गरज नाही. विकी पुढे म्हणाला की, “आमचे नाते इतके घट्ट आहे की आम्ही एकमेकांना एका विशिष्ट पद्धतीने काम करु देतो. शिवाय एकमेकांना वैयक्तिक आयुष्य जगण्यासही परवानगी दिली आहे” असंही तो म्हणाला.