Nitin Desai Suicide Case : सुप्रसिद्ध दिग्दर्शक नितीन देसाई यांनी बुधवारी (२ ऑगस्ट) गळफास घेत आत्महत्या केली. त्यांच्या मृत्यूनंतर संपूर्ण कलाविश्वच हादरुन गेलं. नितीन देसाईंच्या कुटुंबावर दुःखाचा डोंगर कोसळला आहे. त्यांना सध्या जे.जे. रुग्णालयात ठेवण्यात आलं असून शवविच्छेदनाचा अहवालही समोर आला आहे. त्यांनी आत्महत्याच केली असल्याचं शवविच्छेदन अहवालामधून स्पष्ट झालं. पण नितीन देसाई यांनी जेव्हा गळफास घेतला तेव्हा नेमकं काय घडलं? याबाबत एक नवी माहिती आता समोर येत आहे. गळफास घेतलेल्या अवस्थेत नितीन देसाईंना ज्या कर्मचाऱ्याने पहिल्यांदा पाहिलं त्याने काही गोष्टींचा खुलासा केला आहे.
एनडी स्टुडिओचा कर्मचारी मयुर ठोंबरने पहिल्यांदा नितीन देसाई यांना गळफास घेतलेल्या अवस्थेत पाहिलं. दरम्यान मयुर ठोंबरने ‘एबीपी माझा’शी संवाद साधला. यावेळी मयुर म्हणाला, “नितीन देसाई यांनी एक चिट्ठी लिहिली आहे. त्यामध्ये त्यांनी लिहिलं आहे की, माझा अंतिम विधी हा एनडी स्टुडिओमध्येच व्हावा. स्टुडिओमध्येच सहा नंबरच्या ग्राऊंडवर हॅलिपॅड आहे तिथेच नितीन देसाई यांच्यावर अंत्यसंस्कार करण्यात येतील”.
“दादांच्या सुरक्षारक्षकांनाही सुरुवातीला माहित नव्हतं की नेमकं काय घडलं आहे?. आम्ही सुरक्षारक्षकांना विचारलं की, दादा कुठे आहेत?. दादा ऑफिसमध्ये आहेत असं सुरक्षारक्षकांनी आम्हाला सांगितलं. पण दादा ऑफिसमध्ये नव्हते. आम्ही त्यांना गळफास घेतलेल्या अवस्थेत पाहिलं. ते दृश्य खूप भयानक होतं. एका कर्मचाऱ्याला त्यांनी सांगितलं होतं की, तू सकाळी साडे आठ वाजता माझ्या ऑफिसमध्ये ये. रेकॉर्डरवर मी काही गोष्टी रेकॉर्ड केल्या आहेत त्या तपास. दादा बुधवारी (१ ऑगस्ट) रात्री दोन वाजता दिल्लीवरुन आले होते असं त्यांचे सुरक्षारक्षक सांगतात”.
पुढे मयुर म्हणाला, “रेकॉर्डर आम्हाला मिळाला. आम्ही पूर्ण रेकॉर्डिंग ऐकली नाही. आम्ही तो रेकॉर्डर लगेचच पोलिसांच्या ताब्यात दिला. ‘मराठी पाऊल पडते पुढे’चं ज्या सेटवर चित्रीकरण झालं तिथेच त्यांनी आत्महत्या केली. त्यांनी दोरीने धनुष्यबाणाचं चिन्ह तयार केलं. त्या धनुष्यबाणाच्या टोकावर उभं राहून त्याच जागी त्यांनी आत्महत्या केली. मी जेव्हा आतमध्ये गेलो तेव्हा सर्वप्रथम माझं त्या धनुष्यबाणाकडेच लक्ष गेलं. हे धनुष्यबाण तुम्ही बनवलं आहे का? असं आम्ही तिथल्या काही कर्मचाऱ्यांनाही विचारलं. पण त्यांनी नाही असं उत्तर दिलं. दादांनीच ते धनुष्यबाण बनवलं असल्याचं लोक म्हणत आहेत. सकाळी ९.३०च्या सुमारस पोलिस आले”. एनडी स्टुडिओमध्येच नितीन देसाई यांच्यावर अंत्यसंस्कार करण्यात येणार आहेत.
