Ahmedabad Plane Crash : अहमदाबाद येथे झालेल्या एअर इंडियाच्या विमान अपघाताने मन सुन्न केलं. अहमदाबाद येथून लंडनला जाणारे विमान उड्डाण घेतल्यानंतर काही मिनिटांतच खाली कोसळले आणि मोठा स्फोटही झाला. या अपघातात २४२ च्या आसपास पायलट, इतर कर्मचारी आणि प्रवासी होते. या अपघातात केवळ एक प्रवासी बचावला आहे. काळ आला होता पण तो बचावला. मृत्यूच्या दाढेतून तो परतला. हो. भारतीय वंशाचे ब्रिटिश नागरिक विश्वासकुमार रमेश हे या अपघातातून बचावले आहेत. हा चमत्कार नेमका कसा घडला?, ते विमानातून बाहेर कसे आले?, असे अनेक प्रश्न पडले आहेत. हो. या पडलेल्या प्रश्नांची उत्तरे स्वतः विश्वासकुमार रमेश यांनी दिली आहेत.
डीडी न्यूजशी बोलताना आणि डॉक्टरांशी बोलताना विश्वासकुमार म्हणाले की, “विमान अपघातामधून मी जिवंत कसा वाचलो, यावर माझाही विश्वास बसत नाही आहे. काही क्षणासाठी मला वाटले होते की, मीही मरणार, पण अपघातानंतर जेव्हा मी डोळे उघडले तेव्हा मी जिवंत होतो. मग मी सीटबेल्ट काढून तिथून दूर गेलो. विमान उड्डाण घेतल्यानंतर काही सेकंदातच अपघात घडला. विमान वसतिगृहाच्या इमारतीला जाऊन आदळले होते. मी जिथे बसलो होतो, तो भाग आधीच जमिनीवर पडला”.
पुढे ते म्हणाले, “माझ्या बाजूला एक्झिट डोअर होता, त्यामुळे मी तिथून बाहेर पडलो. पण माझ्या विरुद्ध बाजूला एक भिंत असल्यामुळे तिथल्या लोकांना विमानातून बाहेर पडणे शक्य झाले नसावे. मी बाहेर पडल्यानंतर विमानाचा स्फोट झाला. माझ्या नजरेसमोरच दोन एअर होस्टेस आणि एक वृद्ध जोडप्याचा मृत्यू झाला”. विश्वासकुमार यांना विश्वास बसत नव्हता की एवढ्या मोठा अपघातातून ते बचावले. समोर आलेल्या व्हिडीओमध्ये विश्वासकुमार यांच्या चेहऱ्यावर, शरीरावर जखमा दिसत आहेत. दरम्यान, ते सध्या रुग्णालयात उपचार घेत आहेत.
आणखी वाचा – Video : करिष्मा कपूरच्या लग्नात करीनाचा नखरा, नवरीसारखा डोक्यावरुन पदर घेतलेला आणि…; लूक पाहून चाहते हैराण
रुग्णालयात पोहोचल्यानंतर विश्वासकुमार रमेश यांनी डॉक्टरांना सांगितले की, “विमानाच्या उडाणानंतर काही सेकंदातच अपघात घडला. विमान जिथून तुटले, तिथेच ११ए या सीटवर मी बसलेलो. विमान तुटल्यानंतर सीटजवळच एक्झिट डोअर होता. त्यातून वेळीच बाहेर पडल्यामुळे विमानाला झालेल्या स्फोटातून मी वाचलो. मी विमानातून उडी मारली नव्हती. तर माझ्या सीटसह मी फेकला गेलो. मी जिथे पडलो, ती जागा सपाट होती. मी सीट बेल्ट काढला आणि आजूबाजूला नजर टाकली. जमिनीवरच असल्यामुळे मी एक्झिट डोअरमधून बाहेर पडण्याचा प्रयत्न केला आणि मी बाहेर आलो”.
