Pranit More Video : स्टँड अप कॉमेडियन म्हणून महाराष्ट्रात ओळख मिळवणाऱ्या प्रणित मोरे नेहमीच चर्चेत असतो. सोशल मीडियावर नेहमी सक्रिय असणाऱ्या प्रणितने त्याच्या विनोदी अंगाने स्वतःची अशी वेगळी ओळख निर्माण केली आहे. प्रणित मोरेचा खूप मोठा चाहतावर्ग आहे. विनोदाचा अचूक टायमिंग जुळवून प्रणितने प्रेक्षकांची प्रत्येक वेळी पसंती मिळवलेली पाहायला मिळते. कायमच चर्चेत असणाऱ्या प्रणितवर काही दिवसांपूर्वीच हल्ला झाला असल्याचं समोर आलं. सोलापूर येथे स्टँड अप कॉमेडीचा शो संपल्यानंतर प्रणितला १० ते १२ जणांनी मिळून मारहाण केली असल्याचे समोर आलं आणि याबाबतची पोस्ट त्याने इंस्टाग्रामवर शेअर केली होती. त्यानंतर आता प्रणितने आणखी एक व्हिडीओ शेअर करत चाहत्यांचे आभार मानले असून खंत ही व्यक्त केली असल्याचे पाहायला मिळतेय.
प्रणित मोरेवर २ फेब्रुवारी रोजी १० ते १२ जणांनी हल्ला करत मारहाण केली. यादरम्यान प्रणितला एकानं धमकावत, “अगली बार वीर पहारिया बाबा पे जोक मार के दिखा” असे म्हटलं. यामुळे वीर पहारीया यांच्यावर जोक केल्यानं ही मारहाण केलं असल्याचं स्पष्ट झालं. मात्र, वीर पहारियाने प्रणित मोरे वरील हल्ल्याची दखल घेत सोशल मीडियावर पोस्ट करत त्याचा यात काहीही संबंध नसल्याचे म्हटलं आणि या हल्ल्यात जो कोणी व्यक्ती जबाबदार असेल त्यावर कठोर कारवाई करण्यासही विनंती केली. या हल्ल्यानंतर आता प्रणित मोरेने पहिल्यांदा सोशल मीडियावर व्हिडीओ शेअर केला आहे. या व्हिडीओमध्ये त्यानं हल्लेखोराबाबत खूप मोठी खंत व्यक्त केली असल्याचे पाहायला मिळतेय.
आणखी वाचा – चाहतीने मृत्यूपूर्वी संजय दत्तच्या नावावर केली ‘इतक्या’ कोटींची मालमत्ता, किंमत ऐकून व्हाल थक्क
“नमस्कार मित्रांनो, सर्वप्रथम सगळ्यांचे आभार. ज्या लोकांनी माझ्या प्रकृतीबाबत विचारणा केली, प्रार्थना केली. बऱ्याच लोकांनी माझ्यावर झालेल्या हल्ल्याची स्टोरी शेअर केली. ज्यामुळे माझ्यावर झालेला हल्ला अधिक लोकांपर्यंत पोहोचला. आतापर्यंत या प्रकरणात सोलापूर पोलिसांनी पाच लोकांना अटक केली आहे. हे चांगलंच काम झालं आहे. पण, अजूनपर्यंत कोणाला अटक केलीये याची माहिती देण्यात आलेली नाही. जो मुख्य आरोपी आहे, तो अजूनही फरार आहे. ज्यांनी ही गोष्ट केली आहे त्यांच्यावर कारवाई केली पाहिजे, ही मागणी आम्ही सतत करत आहोत. जेणेकरुन पुढे भाषण स्वातंत्र्य करताना किंवा कोणताही व्यक्ती विनोद करत असेल तर त्याला जाऊन मारु शकतो, असा विचार केला नाही पाहिजे”.
“सर्वात महत्त्वाची गोष्ट, जे सीसीटीव्ही फुटेज आहे, ते पोलिसांनी घेतले आहेत. त्यामुळे आम्ही मागील सहा दिवसांपासून सतत पाठपुरावा घेत आहोत. जे काही बोललं जात आहे. हे खरंच घडलं होतं का? हे कोणी केलं? हे सर्वकाही स्पष्ट होईल. कारण सीसीटीव्ही फुटेजमध्ये स्पष्टपणे सर्वकाही दिसत आहे. याप्रकरणात कोण-कोण लोक होते? त्यामुळे समजलेच. त्या लोकांनी काय-काय केलं आहे? जशी माझी शेवटची पोस्ट सगळ्यांपर्यंत पोहोचली होती, तसाचा हा व्हिडीओ देखील पोहोचला जाईल. लवकरात लवकर कारवाई होईल आणि त्यामुळे समजले की, याप्रकरणात नेमका कोणाचा हात होता?”.
