Vaishnavi Hagawane death : पुण्यातील वैष्णवी हगवणे आत्महत्या प्रकरणाला एक वेगळंच वळण आलं आहे. आत्महत्या केलेल्या वैष्णवीला न्याय द्यायचा सोडून तिच्याच अंगावर शिंतोडे उडवले जात आहेत. वैष्णवीच्या चारित्र्यावर शंकादेखील आरोपी हगवणे कुटुंबाकडून आणि त्यांच्या वकीलांकडून घेण्यात आली. हगवणे कुटुंबातील आरोपींची बाजू न्यायालयात वकील विपुल दुशींग यांच्याकडून मांडली जातं आहे. दरम्यान, वैष्णवी हगवणे प्रकरणात आरोपी असलेले संपूर्ण कुटुंब पोलीस अटकेत असून त्यांना न्यायालयीन कोठडी सुनावण्यात आली आहे. हे प्रकरण आता न्यायालयाची पायरी चढलं असून न्यायालयात हगवणेंच्या वकिलाकडून युक्तिवाद करण्यात आला. यादरम्यान, त्यांनी वैष्णवीच्या चारित्र्यावर संशय घेतला.
हगवणेंचे वकील विपुल दुशींग यांनी वैष्णवीलाचा या आत्महत्येला जबाबदार धरताच सर्वच क्षेत्रातून त्यांच्यावर संताप व्यक्त केला जात आहे. वकिलांनी केलेला युक्तिवाद कोणालाच पटला नसून त्यांच्यावर टीकेची झोड उमटवली जात आहे. अशातच समोर आलेल्या माहिनुसार विपुल दुशींग यांच्यावरच सरकारी वकीलाला कॉलर पकडून मारहाण केल्याचा गुन्हा नोंद आहे. ‘एबीपी माझा’ने या माहितीची पुष्टी केली आहे. सरकारी वकिलांवर हात उगारणारा वकील आरोपी हगवणेंच्या बाजूने लढा देत आहे हे एकमेकांना अगदी साजेसं आहे असं म्हणणं चुकीचं ठरणार नाही.
२०२२ साली पुण्यातील वडगाव मावळ न्यायालयात वकिल दुशींग हे एका आरोपीचे वकील म्हणून काम पाहत होते. न्यायाधीशांसमोर सुनावणीची पुढची तारीख कोणती ठेवायची यावरुन त्यांचे सरकारी वकील प्रेमकुमार अग्रवाल यांच्यासह वाद झाला. त्यामुळे चिडून न्यायालयातून बाहेर पडल्यावर वकील दुशींग यांनी सरकारी वकील प्रेमकुमार अग्रवाल यांची कॉलर पकडून त्यांना मारहाण केली.अग्रवाल यांच्या तक्रारीनंतर वकील दुशींग आणि त्यांच्याबरोबर असलेल्या अन्य दोन वकीलांवर वडगाव मावळ पोलीस ठाण्यात गुन्हा दाखल करण्यात आला होता. न्यायालयाने त्यावेळी अटक पुर्व जामीन दिल्याने दुशींग यांची अटक त्यावेळी टळली होती.
वैश्नवीचे न्यायालयात चारित्र्य खराब करण्याचा प्रयत्न वकिलांकडून करण्यात आला. वैष्णवीची टेंडंसी ही सुसाईड करण्याची होती, तिचे एका व्यक्तीबरोबरचा संवादही समोर आला आहे. त्यातून तिने अनेकदा आत्महत्येचा प्रयत्न केला होता. एकदा रॅट पॉइझन खाऊन आणि एकदा गाडीतून उडी मारुन तिने जीवन संपवण्याचा प्रयत्न केला, असा धक्कादायक दावा राजेंद्र हगवणेंचे वकील विपुल यांनी न्यायालयात केला.
