मराठी, हिंदीसह इतर भाषांत ‘बोल्ड, बिनधास्त आणि ब्युटीफुल’ अशी आपली वेगळी ओळख निर्माण करुन प्रेक्षकांच्या मनात घर केलेली मराठमोळी अभिनेत्री म्हणजे सई ताम्हणकर. सई ताम्हणकर तिच्या अभिनयामुळे जितकी चर्चेत असते. तितकीच ती तिच्या स्टायलिश फोटोंमुळेदेखील चर्चेत राहत असते. सई ही अनोख्या व वेगवेगळ्या स्टाईलमुळे जितकी चर्चेत राहत असते तितकीच अभिनेत्री तिच्या अनेक वक्तव्यांमुळेही चांगलीच चर्चेत असते. अशातच तिने नुकतीच ‘Hauterfly’ला मुलाखत दिली.
सईचं वैयक्तिक आयुष्यदेखील खूपच चर्चेत राहीलं आहे. सई ताम्हणकरने अमेय गोसावीबरोबर लग्नगाठ बांधली होती. सई व अमेयची एका मित्राच्या माध्यमातून मैत्री झाली आणि नंतर त्याचं प्रेमात रुपांतर झालं. मग २०१३ मध्ये दोघांनी लग्न केलं. पण, त्यांचं हे प्रेम फार काळ टिकलं नाही. यानंतर अवघ्या दोन वर्षांनी २०१५ मध्ये सई व अमेय यांनी घटस्फोट घेतला. त्यांच्या या घटस्फोटाबद्दल तिने या मुलाखतीमध्ये भाष्य केलं आहे.
याबद्दल बोलताना तिने असं म्हटलं की, “जेव्हा तुम्ही या गोष्टी करता तेव्हा तुम्ही खूप वेगळ्या शांततेत असता, जेव्हा तुम्ही त्या कागदपत्रावर कोर्टात सही करता. तेव्हा तिथे तुम्हाला तुमच्या नावाने मोठा आवाज देऊन बोलावले जाते. दोन्ही बाजूच्या लोकांचे आवाज देऊन बोलावले जाते. तिथे मला सई ताम्हणकर गोसावी म्हणून आवाज दिला गेला आणि लग्नानंतर तुम्ही घटस्फोट घ्यायला जाता तेव्हा तुम्हाला तुमच्या लग्नानंतरच्या नावानेच बोलावले जाते”.
यापुढे तिने असं म्हटलं की, “त्यानंतर आम्ही पार्टीसाठी गेलो. मग तिथे थोडं रडणं वगैरे झालं. काही लोकांनी आयुष्याबद्दल धडे दिले. आमच्याबद्दल विचारले. त्यानंतर अगदी खास मित्रांनी आम्हाला फोन करत कुठे आहात?, कुठे आहात? असं विचारलं आणि असे एकेक करून आम्ही आठ-दहा जण जमले. मग आम्ही एकमेकांबरोबर खूप चांगला वेळ घालवला”.
दरम्यान, सई ताम्हणकर लवकरच नागराज मंजुळेंच्या ‘मटका किंग’मध्ये दिसणार आहे. अभिनेत्री सई ताम्हणकर या सीरिजचा एक महत्त्वाचा भाग असणार आहे. सई आणि नागराज पहिल्यांदाच या सीरिजसाठी एकत्र आले आहेत. त्यामुळे या सीरिजमधील तिच्या भूमिकेसाठी प्रेक्षक उत्सुक आहेत.