Pooja Sawant Siddhesh Chavan Wedding : सिनेसृष्टीतील अखेर कलरफुल अशी अभिनेत्री लग्नबंधनात अडकली आहे. बऱ्याच दिवसांपासून अभिनेत्री पूजा सावंतच्या लग्नाची जोरदार चर्चा सुरु असलेली पाहायला मिळाली. अखेर आता पूजाचा लग्नसोहळा थाटामाटात पार पडलेला पाहायला मिळत आहे. दिनांक २८ फेब्रुवारी रोजी पूजाचा शाही विवाहसोहळा संपन्न झाला. पूजाने सिद्धेश चव्हाणसह लगीनगाठ बांधत आयुष्याच्या एका नव्या वाटेवर पाऊल टाकलं आहे. लग्नानंतर पूजा व सिद्धेश दोघांवर शुभेच्छांचा वर्षाव होताना पाहायला मिळत आहे.
नातेवाईक, कलाकार मंडळी, मित्रपरिवार व कुटुंबीय यांच्या उपस्थितीत पूजा व सिद्धेशचा भव्य दिव्य असा विवाह सोहळा संपन्न झाला. अवाढव्य खर्च, महागडे कपडे, स्वादिष्ट भोजन या सर्वच गोष्टीत कोणतीच कमतरता न भासू देता पूजा व सिद्धेश अखेर लग्न बंधनात अडकले आहेत. काही दिवसांपूर्वी पूजाने तिच्या नवऱ्याचा फोटो शेअर करत चाहत्यांना आश्चर्याचा धक्का दिला. त्यानंतर गेल्या महिन्यात पूजाने थेट साखरपुडा सोहळा उरकत चाहत्यांना सुखद धक्का दिला. तेव्हापासून पूजाच्या लग्नाची साऱ्यांना चाहूल लागून राहिली होती.
अखेर आता पूजा सावंत लग्न बंधनात अडकली आहे. पूजाच्या लग्नापूर्वीच्या विधींचेही फोटो, व्हिडीओ तुफान व्हायरल झाले. तर लग्नातल्या रिसेप्शन लूकच्या फोटोंनी साऱ्यांचेच लक्ष वेधून घेतले. भरजरी कपडे परिधान करत दोघांचा लूक खूपच सुंदर दिसत होता. पूजाने लग्नाच्या रिसेप्शनसाठी लाल रंगाची साडी परिधान केली होती. तर सिद्धेशने कुर्ता, पायजमा व त्यावर नक्षीदार अशी शॉल घेतली होती. लग्न लागल्यानंतर पूजासाठी तिच्या नवऱ्यानं म्हणजे सिद्धेशने घेतलेला उखाणा खूपच खास होता. बायकोसाठी उखाणा घेत सिद्धेश म्हणाला, “ऑस्ट्रेलियाच्या समुद्रात जीवनाची नौका, पूजाचं नाव घेतो सर्वजण ऐका!”. हा उखाणा ऐकताच साऱ्यांनी सिद्धेशच कौतुक केलं.
पूजाचा होणारा नवरा सिद्धेश चव्हाण सध्या भारतात राहत नसून ऑस्ट्रेलियातील एका फायनान्स कंपनीत काम करत आहे. पूजाने “सिद्धेश कायमस्वरुपी ऑस्ट्रेलियात नाही. तो आताच दोन वर्षांपूर्वी गेला आहे. तो मूळचा मुंबईचा आहे. त्याचे आई-बाबा मुंबईत आहेत. त्यामुळे आम्ही सगळे मुंबईतचं राहणार आहोत. काही वर्षांसाठी सिद्धेश ऑस्ट्रेलियात आहे. म्हणून मी काही वर्ष येऊन जाऊन करेन”, असं एका मुलाखतीत उत्तर दिलं होतं.
