नांदेड येथील शासकीय रुग्णालय व वैद्यकीय महाविद्यालय सध्या तेथील मृतांच्या संख्येमुळे चर्चेत आहे. रुग्णालयात मागील २४ तासांत १२ नवजात बालकांसह तब्बल २४ जणांचा मृत्यू झाल्याचा धक्कादायक प्रकार समोर आला. त्यानंतर या घटनेचा सर्वच स्तरातून निषेध करण्यात येत असून घटनेनंतर या प्रकरणाची चौकशी सध्या सुरु आहे. दरम्यान, या प्रकारानंतर खासदार हेमंत पाटील यांनी या रुग्णालयाच्या अधिष्ठातांना शौचालय साफ करण्यास लावल्याची घटना घडली. या घटनेवरही अनेक प्रतिक्रिया येत आहे. अशातच अभिनेत्री केतकी चितळेने या घटनेवर एक वादग्रस्त पोस्ट शेअर केली. (Ketaki Chitale Facebook Post)
मराठी अभिनेत्री केतकी चितळे सध्या अभिनयक्षेत्रात सक्रिय नसली, तरी ती सोशल मीडियावर सक्रिय आहे. मात्र, तिच्या सोशल मीडियावरील पोस्टमुळे अनेकदा ती अडचणीत सापडली असून एकदा तिला तुरुंगातदेखील जावं लागलं आहे. असं असूनदेखील ती नेहमीच कोणत्या ना कोणत्या मुद्द्यावर बेधडक वक्तव्ये करत असते. आता तिने फेसबुकवर एक वादग्रस्त पोस्ट शेअर करत या घटनेचे अप्रत्यक्षरित्या समर्थन केलं आहे.
हे देखील वाचा – ‘सिंधुताई माझी माई’ मालिकेत शिवानी सोनारची एन्ट्री, सिंधुताईंच्या भूमिकेत दिसणार, प्रोमो समोर
शेअर केलेल्या या पोस्टमध्ये केतकी म्हणते, “एका रुग्णालयाच्या डीनला आता रुग्णालयामधील संडास साफ करा, हे त्याची जात बघून सांगायचे तर! आणि तरीही आपल्याकडे खोट्या ॲट्रॉसिटीच्या केसेस टाकल्या जात नाहीत. जय हो ॲट्रॉसिटी कायदा. आम्ही सामान्य माणासांवर काय, तर आता कुठल्या पदालाही नाही सोडणार.” तिच्या या पोस्टची जोरदार चर्चा होत आहे. शिवाय, काहींनी तिच्या या पोस्टवर टीकादेखील केली आहे. केतकीने ‘तुझं माझं ब्रेकअप’ आणि ‘आंबट गोड’ मालिकेत काम केलं आहे. त्याचबरोबर तिने हिंदी मालिकांमध्येसुद्धा काम केलेलं आहे.
