बॉलीवूड मधील आगामी चित्रपटांची प्रेक्षक खूप आतुरतेने वाट बघत असतात. अनेक बॉलीवूड चित्रपटांकडे प्रेक्षकांचं लक्ष आहे. काही दिवसांपूर्वी ‘घुमर’ या चित्रपटाचं पोस्टर प्रदर्शित झाले असून या चित्रपटाचा ट्रेलर देखील प्रदर्शित झाला आहे. बॉलीवूड मधील सुप्रसिद्ध अभिनेता अभिषेक बच्चन आणि अभिनेत्री सैयामी खेर या चित्रपटात मुख्य भूमिका साकारताना दिसत आहेत. (Ghoomer Trailer)
अभिषेक एका प्रशिक्षकाची व्यक्तिरेखा साकारत पॅराप्लेजिक खेळाडूला प्रशिक्षण देताना दिसतोय तर खेळाडूची भुमिका सैयामी साकारत आहे. अभिषेक बऱ्याच चित्रपटातून चाहत्यांच्या समोर येत असतो. पण अभिषेक ‘घुमर’ या चित्रपटात वेगळ्याच भूमिकेत असून चाहत्यांची मनं जिंकण्यासाठी सज्ज झाला आहे. चित्रपटाच्या ट्रेलरला प्रेक्षकांचा चांगलाच प्रतिसाद पाहायला मिळतोय.
या ट्रेलरची सुरुवात अभिषेक बच्चनच्या डायलॉगने होते, यात मद्यधुंद अवस्थेत दिसतो. तर या चित्रपटात सैयामी खेरचा बॉयफ्रेंड अंगद असतो. पण तिच्यासाठी क्रिकेट तिच्या प्रेमापेक्षा जास्त महत्त्वाचं आहे. सैयामीची भारतीय संघात निवड झाल्यानंतर तिच्या आयुष्यात मोठं वादळ येतं आणि एका अपघातात तिचा एक हात तिला गमवावा लागतो. त्यानंतर तिच्या संघर्षाची कथा सुरु होते. मग तिची संघर्ष गाथा आणि त्यानंतर तिला मिळणारं फळ काय, हे आपल्याला या चित्रपटात पहायला मिळेल.(abhishek bachchan)
या चित्रपटाची कथा हंगेरियन नेमबाज कॅरोली टाक्स हिच्या कथेपासून प्रेरित आहे. तिच्या उजव्या हाताला गंभीर दुखापत झाल्यानंतर तिने डाव्या हाताने खेळून दोन ऑलिम्पिक सुवर्णपदके जिंकली होती. आर. बल्की यांनी या चित्रपटाचं दिग्दर्शन केलं असून हा चित्रपट १८ ऑगस्ट रोजी प्रेक्षकांच्या भेटीला येणार आहे. यामध्ये अभिषेक आणि सैयामीसह अंगद बेदी, शबाना आझमी यांच्यासारखे कलाकारही महत्त्वाच्या भूमिकेत दिसणार आहेत. एका पेक्षा एक सरस चित्रपट प्रेक्षकांच्या भेटीला येत आहेत. प्रेक्षकांना ‘घुमर’ या चित्रपटातून नवीन कथा पाहायला मिळणार आहे. ‘घुमर’ च्या ट्रेलरवर प्रेक्षकांनी अनेक कमेंट्स करत सिनेमाचं कौतुक केलंय.
