स्टार प्रवाह वरील लोकप्रिय आई कुठे काय करते या मालिकेचा प्रवास नुकताच संपला. काल म्हणजेच ३० नोव्हेंबर रोजी या मालिकेचा शेवटचा भाग प्रसारित झाला. गेली पाच वर्षे या मालिकेने प्रेक्षकांच्या मनावर अधिराज्य गाजवले. मालिकेबरोबरच मालिकेतेली कलाकारांनीही प्रेक्षकांच्या मनात आपले स्थान निर्माण केले. मालिकेतील अरुंधती, अनिरुद्ध, रुपाली, अभिषेक, यश, ईशा, कांचन आजी, आप्पा या मुख्य पात्रांबरोबरच नव्याने आलेल्या कलाकारांनाही प्रेक्षकांनी तितकेच भरभरून प्रेम केले. यापैकीच एक नवोदित कलाकार म्हणजे सुमंत ठाकरे. मालिकेत त्याने अनिष ही ईशाच्या बॉयफ्रेंड व कालांतराने तिच्या नवऱ्याची भूमिका साकारली होती. (Sumant Thakre Emotional Post)
अशातच त्याने आता मालिका संपताच सोशल मीडियावर एक भावुक पोस्ट शेअर केली आहे. सुमंत ठाकरेने मालिकेतील अनिषच्या भूमिकेतील आणि इतर कलाकारांबरोबरचे फोटो शेअर करत असं लिहिलं आहे, “पहिली नेहमी खास असते… काल ‘आई कुठे काय करते’ मालिकेचा शेवटचा भाग प्रसारित झाला. हे थोडं अस्वस्थ करणारं आहे पण हा प्रवास समृद्ध करणारा आहे. कधी कधी संधी विचित्र मार्गाने येते, तो मार्ग जितका विचित्र तितकाच ती स्वीकारल्यावरचा प्रवास सुखद, असं माझं मत आहे. मी प्रदीप दादाचा नेहमी ऋणी राहीन. नमिता वर्तक तुझं मार्गदर्शन, योग्य निर्णय घ्यायला मदत करणं, पात्र समजावून सांगणं, चूक सुधारायला लावणं, नको त्या गोष्टींसाठी उगाच रागावणं सगळ्याचसाठी खूप धन्यवाद… तुझ्यामुळे ही संधी मिळाली”.
यापुढे त्याने असं म्हटलं आहे की, “DKP सारखं प्रोडक्शन हाऊस मिळणं ही माझ्यासाठी खूप मोठी गोष्ट होती. आमचे कॅप्टन रवी सर. त्यांच्या संवेदनशील, डोळस, शांत आणि चिकित्सक दृष्टिकोनामुळे हा ‘प्रवाह’ इथवर आला आहे. मराठी रंगभूमी घडवणाऱ्या, जगवणाऱ्या दिग्गजांचे त्यांच्यावर संस्कार आहेत. नटाला समाधान देणारे क्षण सरांच्या कामात असतात. त्याची शैली हे दाखवते की त्यांची दिग्दर्शनाची ताकद काय आहे, भविष्यात त्यांच्या हातून अनेक कलाकृती घडाव्या, हीच ईच्छा. त्यांचे खंदे सहकारी, तितकेच गुणी, आपला वेगळा विचार ठामपणे मांडणारे, पडद्यामागून शांतपणे काम करणारे आणि तेवढ्याच खोडकरपणे एखाद्या शब्दाचा चोथा करणारे आयुष्यभरासाठी लाभलेले मित्र, कोटी कंपनीचे मालक तुषार आणि सुबोध दादा”.
पुढे सुमंतने या पोस्टमध्ये असं म्हटलं आहे की, “प्रत्येक डिपार्टमेंटमधील मित्रांशी जडलेली मैत्री आयुष्यभर जपून ठेवेन. माझ्या गुणी हरहुन्नरी हुशार सहकलाकारांनी हा प्रवास फुलवला. मधुराणीने साकारलेली आई मला कधीही विसरता येणार नाही. ईला ताईसारख्या प्रेमळ आजी जी खऱ्या आयुष्यात आणखीन जास्त प्रेम करते. माझ्या जगात सामील होऊन माझ्या आयुष्याचा मोठा भाग बनलास ओंकार, तुझे आभार कसे मानू. अपूर्वा, तुझं वेळोवेळी मदत करणं, इतक्या आठवणी, सीन्स, त्यावर चर्चा, गाणी, आणि माझी गॉडमदर होणं, यासाठी मनापासून धन्यवाद”.
आणखी वाचा – रविवारी तूळ राशीच्या लोकांचे उत्पन्न वाढेल तर मकर राशीच्या लोकांना नोकरीत बढती मिळेल, अधिक जाणून घ्या…
यापुढे सुमंत या पोस्टमध्ये असं म्हणतो की, “या प्रवासाने मला शिकवलं की एक मालिका का लोकप्रिय ठरते—ती फक्त कथा नाही तर त्यात काम करणाऱ्या प्रत्येकाच्या प्रेमाने आणि मेहनतीने साकार होते. मला भेटलेली माणसं आयुष्यभर साथ देतील, हे समाधान आहे. ‘आई कुठे काय करते’ ही माझ्या पदार्पणाची मालिका आहे आणि कायम हृदयाच्या जवळ राहील. खूप खूप प्रेम”.
