Bigg Boss Marathi 5 : ‘बिग बॉस मराठी’च्या पाचव्या पर्वातील मंगळवारचा दिवस एका कारणाने चांगललाच गाजला आणि हे कारण म्हणजे जान्हवी किल्लेकरने पंढरीनाथ कांबळे यांचा केलेला अपमान. घरात ‘सत्याचा पंचनामा’ टास्कदरम्यान पंढरीनाथ कांबळे उर्फ पॅडी दादा यांच्याशी बोलताना जान्हवी किल्लेकरची जीभ घसरली होती. टास्कदरम्यान, निक्कीने पॅडी दादांना ‘जोकर’ म्हटलं होतं. तर, जान्हवीने नंतर त्यांच्या कारकिर्दीचा, अभिनयाचा अपमान केला. जान्हवीच्या या घाणेरड्या वक्तव्यामुळे प्रेक्षकांमध्ये आणि कलाकारांमध्ये संतापाचं वातावरण निर्माण झालं होतं. विशाखा सुभेदार, सुरेखा कुडची, अभिजीत केळकर, सिद्धार्थ जाधव यांसारख्या अनेक कलाकारांनी जान्हवीला धारेवर घेतलं होतं. मराठी सिनेसृष्टीतील अनेक कलाकारांनी अबद्दल रोष व्यक्त केला. यावर आता त्यांच्या मुलीची प्रतिक्रिया समोर आली आहे. (Bigg Boss Marathi 5 Daily Update)
अनेक कलाकार व प्रेक्षकांच्या प्रतिक्रियांदरम्यान पॅडी कांबळे यांची मुलगी ग्रिष्मा कांबळेनेदेखील अभिनेत्रीला सुनावलं आहे. पॅडी यांची लेक ग्रिष्मा कांबळे हिने जान्हवीला उद्देशून इन्स्टाग्रामवर एक पोस्ट शेअर केली आहे. या पोस्टमध्ये ग्रिष्माने असं म्हटलं आहे की, “प्रिय “अभिनेत्री” जान्हवी किल्लेकर, जितकं स्पष्ट तू स्वतःचं नाव उच्चारत नसशील तितकं स्पष्ट आणि आदराने बाबा तुझं नाव घेतो. मुखावाटे बाहेर पडलेल्या प्रत्येक शब्दाचा अर्थ, महत्त्व, वजन आणि टायमिंग या गोष्टींची समज आणि भान त्यांना आहे हे त्यांनी सिद्ध केलं आणि म्हणूनच तुझ्या अपमानाला कोणतीही मर्यादा नं ओलांडता अगदी संयमाने योग्य असं उत्तर दिलं”.
यापुढे तिने असं म्हटलं आहे की, “खरंतर ‘ओव्हरअ‍ॅक्टींग’ हा शब्द तुझ्या तोंडून निघणं हे हास्यास्पद आहे. हे बघ साधी गोष्ट आहे, स्पर्धकांच्या घरात सुरू असलेल्या गेमबद्दल तू हवं तेवढं बोलू शकतेस, पण त्यांच्या वैयक्तिक आयुष्यावर बोलण्यासाठी विशेषत: वर्षा उसगांवकर आणि पॅडी कांबळे यांच्या करिअरवर बोलण्याआधी तुला त्यांच्या एवढी मराठी इंडस्ट्रीत स्वतःची ओळख कमवावी लागेल. त्याचप्रमाणे महाराष्ट्रातल्या असंख्य प्रेक्षकांची मनही जिंकावी लागतील. कारण नसताना सतत आपल्यापेक्षा वयाने आणि कर्तृत्वाने मोठ्या असलेल्या लोकांविषयी अनादर करणं हा गेम नाही. मुळात समोरच्याचा अपमान करणं हा बाबाचा स्वभाव नाही. तुझ्या पातळीला न उतरून त्याने स्वतःची, गेमची आणि विशेष म्हणजे तुझी प्रतिष्ठा राखली आहे. संतापात डोक्याचा ताबा हरवून मनाला वाट्टेल ते बोलणारी तू निक्की तांबोळीची सावलीच आहेस”.
यापुढे ग्रिष्मा असं म्हणाली आहे की, “जेव्हा गेम बाहेर असलेल्या तुझ्या लेकराचा विनाकारण उल्लेख झाला तेव्हा तुला ते पटलं नाही. आज तू गेम बाहेरच्या, बाबाने लेकरासारखाच वाढवलेल्या, फुलवलेल्या करिअरविषयी एवढं बोललीस ते मात्र तुला पटलं. हा तुझा “Fair Game” संपूर्ण महाराष्ट्र पाहतोय एवढं लक्षात ठेव. त्याच्या संस्कारात वाढली आहे मी, त्यामुळे जर माझ्या बोलण्यामुळे तुझ्या भावना दुखावल्या असतील तर मी तुझी माफी मागते. माझा हेतू फक्त त्याची लेक म्हणून स्वतःचं मत मांडणं एवढाच आहे”. दरम्यान, ग्रिष्माची ही पोस्ट सध्या सोशल मीडियावर व्हायरल होत असून या पोस्टखाली मुग्धा गोडबोले, विशाखा सुभेदार यांसारख्या अनेक कलाकारांनी तिच्या मताला संमती दर्शवली आहे.
