मराठी मनोरंजन विश्वात छोट्या पडद्यासह मोठा पडदा गाजवणारं मोठं नाव म्हणजे प्रसिद्ध अभिनेत्री उषा नाडकर्णी. ‘सिंहासन’ या मराठी चित्रपटातून उषा ताई यांनी झगमगत्या दुनियेत पाऊल ठेवले आणि नंतर मागे त्यांनी वळून पाहिले नाही. १९९९ मध्ये त्यांनी चित्रपटांनंतर मालिकेत एण्ट्री घेतली. मग मराठी नाटक, चित्रपट व मालिका यांमध्ये काम करत उषा नाडकर्णी यांनी प्रेक्षकांचे भरभरून मनोरंजन केलं. त्यांच्या याच अथक मेहनतीमुळे त्यांना बॉलिवूडमध्येही अनेक नावाजलेले कलाकार आणि दिग्दर्शक ओळखतात. मराठी, हिंदीमधील कलाकार व दिग्दर्शकांबरोबर काम केल्यानंतर नुकतंच त्यांनी साऊथचा सुपरस्टार विजय सेतूपतीबरोबरही काम केले.
याबद्दल उषा नाडकर्णी यांनी ‘इट्स मज्जा’च्या ‘ठाकूर विचारणार’ या मुलाखतीच्या कार्यक्रमात भाष्य केलं. ‘गांधी टॉक्स’ या चित्रपटात उषा नाडकर्णी व विजय सेतुपती यांनी एकत्र काम केले असून यात उषा यांनी विजयच्या आईची भूमिका साकारली आहे. यावेळी विजयच्या वागणुकीमुळे व त्याच्या साध्या स्वभावामुळे उषा नाडकर्णी त्याच्यावर खूपच खुश झाल्या. साऊथचा सुपरस्टार असलेल्या विजयचा साधेपणा उषा ताई यांना अतिशय भावला असून यावेळी विजयचे कौतुक करण्यात त्या अजिबात थांबल्या नाहीत.
याबद्दल बोलताना उषा नाडकर्णी यांनी असं म्हटलं की, “‘गांधी टॉक्स’ या चित्रपटात मी विजयच्या आईची भूमिका केली आहे. साऊथचा सुपरस्टार असूनही तो अगदीचं साधा आहे. आपल्याकडे मराठीत किंवा हिंदीत इतकूसं काम केलं तरी माज दाखवतात. पण तो इतका मोठा माणूस असूनही जमिनीवर बसतो. आम्ही दोघे माय-लेक असून चित्रपटाच्या दरम्यान खूप गप्पा मारल्या आणि तो इतका साधा आहे की, लोकांनी त्याच्याकडून शिकलं पाहिजे. पॅकअपच्या दिवशीही त्याने मला नमस्कार केला तेव्हा मी पण त्याचे गाल ओढले. एवढा मोठा नट असूनही त्याला अजिबात माज नाही”.
आणखी वाचा – Video : बाप तो बापच! चारुहासला वाटतोय आपल्या लेकाचा अभिमान, अधिपतीला कळणार का बापाचं प्रेम?
दरम्यान, ‘गांधी टॉक्स’ या चित्रपटाचे दिग्दर्शन किशोर बेळेकर यांनी केले आहे. झी स्टुडिओज, क्युरियस डिजिटल आणि मूव्ही मिल एंटरटेनमेंट यांची सहनिर्मिती असलेला हा चित्रपट लवकरच प्रदर्शित होणार आहे. चित्रपटात विजय सेतुपतीबरोबर अभिनेता सिद्धार्थ जाधव, अरविंद स्वामी, आदिती राव हैदरी यांच्यासह उषा नाडकर्णी यांचीही प्रमुख भूमिका आहेत. ‘गांधी टॉक्स’ हा एक डार्क कॉमेडी चित्रपट आहे.
