‘महाराष्ट्राची हास्यजत्रा’ या लोकप्रिय कार्यक्रमाने अनेक कलाकारांना प्रसिद्धी मिळवून दिली. कोरोना काळात या कार्यक्रमाने अनेकांच्या चेहऱ्यावर हास्य खुलवण्याचे काम केले. या शोमधून अनेक कलाकार मंडळी प्रेक्षकांच्या घराघरांत पोहोचले. अशा अनेक कलाकारांपैकी एक अभिनेता म्हणजे निखिल बने. ‘आज भी दिन बने’ अशा आपली एक वेगळी ओळख निर्माण करत त्याने अनेकांच्या मनात आपले स्थान निर्माण केलं. निखिल हा मूळचा कोकणातला आहे. त्यामुळे तो त्याचं गावावरील प्रेम सोशल मीडियावर अनेक व्हिडीओद्वारे व्यक्त करत असतो. याआधी त्याने अनेक व्हिडीओ शेअर करत त्याच्या कोकण प्रवासाची सफर घडवून आणली असल्याचे पाहायला मिळाले आहे.
निखिल बनेचा सोशल मीडियावर खूप मोठा चाहतावर्ग आहे. सोशल मीडियाद्वारे निखिल नेहमीच काही ना काही शेअर करत चाहत्यांच्या संपर्कात असतो. विशेषतः गावाकडच्या आठवणीही तो चाहत्यांबरोबर शेअर करत असतो. आणि त्याच्या या व्हिडीओला चाहत्यांकडूनही चांगलाच प्रतिसाद मिळतो. अशातच त्याने नुकताच एक व्हिडीओ शेअर केला आहे, ज्याद्वारे त्याने पुन्हा एकदा त्याच्या चाहत्यांना पुन्हा एकदा कोकणची खास सफर घडवून आणली आहे. या व्हिडीओद्वारे त्याने त्याच्या कोकणातल्या शूटिंगचा अनुभव शेअर केला आहे आणि या व्हिडीओमध्ये त्याचे हास्यजत्रेतील दोन मित्रदेखील आहेत.
निखिलने त्याच्या इन्स्टाग्राम अकाऊंटद्वारे शेअर केलेल्या व्हिडीओमध्ये असं म्हणतो की, “शूटिंगसाठी कोकणात जात आहे आणि याचा आनंद माझ्या चेहऱ्यावर दिसत आहे. त्यानंतर कोकणातील छान पाऊस व निसर्गाचा मनमुराद आनंद घेत आम्ही कोकणातल्या गावी पोहोचलो”. कोकणातील गुहागरमधील नरवण या गावी आम्ही शूटिंग करत असून हा चित्रपट हॉरर असल्याचेही त्याने या व्हिडीओमध्ये म्हटले आहे.
या व्हिडीओमध्ये निखिलने त्याच्या शूटिंगच्या घराची, मुंबई-गोवा महामार्गावरील कशेडी भोगदा व कोकणातील खास निसर्गाची झलक दाखवली आहे. त्याचबरोबर यावेळी शूटिंगला त्यांनी काय मजामस्ती केली त्याचेही खास क्षण दाखवले आहेत. त्याचबरोबर निखिल शूटिंग राहत असलेले घर हे १२८ वर्षे जुने असल्याचेही त्याने या व्हिडीओमध्ये सांगितले आहे. कोकणातील गावच्या या व्हिडीओवर निखिलने ‘शूटिंगसाठी कोकणात गेलो’ असं म्हटलं असून या व्हिडीओमार्फत त्याच्या चाहत्यांना कोकणात तो शूटिंग करत असलेल्या गावची खास सफर घडवली आहे.
निखिलने शेअर केलेल्या या व्हिडीओला चाहत्यांनीही लाईक्स व कमेंट्सद्वारे चांगलाच प्रतिसाद दिला आहे. या व्हिडीओखाली चाहत्यांनी “इतका मोठा स्टार असूनही तुला अजिबात गर्व नाही”, “नरवन गाव खूप छान आहे”, “तुझ्या या चित्रपटाची आम्ही वाट पाहत आहोत” अशा अनेक कमेंट्स करत या व्हिडीओला प्रतिसाद दिला आहे.