चित्रपटसृष्टीतून एक दु:खद बातमी समोर आली आहे. प्रसिद्ध तमिळ अभिनेते प्रदीप के विजयन यांचे निधन झाले आहे. प्रदीप के विजयन यांच्या आकस्मिक निधनाने चित्रपटसृष्टीत शोककळा पसरली आहे. प्रदीप के विजयन हे चेन्नईतील राहत्या घरी मृतावस्थेत आढळून आल्याचे सांगण्यात येत आहे. या बातमीनंतर अभिनेत्याचे चाहते सोशल मीडियावर त्यांना श्रद्धांजली वाहत आहेत. (Pradeep K Vijayan death)
‘हिंदुस्तान टाइम्स’च्या वृत्तानुसार, अभिनेता बुधवारी त्याच्या राहत्या घरी मृतावस्थेत आढळून आला. दोन दिवस कोणतीही बातमी न मिळाल्याने अभिनेत्याचा मित्र त्याला त्याच्या घरी भेटायला गेला असता तो घरी मृतावस्थेत आढळून आला. हे प्रकरण पोलिसांपर्यंत पोहोचले आहे. याप्रकरणी पोलीस मृत्यूच्या कारणाचा तपास करत आहेत. अद्याप कोणतेही अधिकृत निवेदन जारी करण्यात आलेले नाही.
मिळालेल्या माहितीनुसार असं समोर आलं आहे की, घराचा दरवाजा बंद होता. मित्राने अनेकदा ठोठावूनही प्रदीपने दरवाजा उघडला नाही, त्यानंतर अभिनेत्याच्या मित्राने पोलिसांना कळवले. अग्निशमन दलासह नीलंकराई पोलिसांनी घराचा दरवाजा तोडला. पोलिसांना अभिनेत्याच्या डोक्यावर जखमेच्या खुणाही आढळल्या. पोलिस अभिनेत्याचा मृतदेह रॉयपेट्टा सरकारी रुग्णालयात घेऊन गेले आहे. अभिनेता प्रदीप के विजयन ‘थेगिडी’ मध्ये साकारलेल्या भूमिकेसाठी खूप लोकप्रिय झाले होते. याशिवाय त्यांनी ‘टेडी’, ‘इरुम्बू थिराई’ आणि ‘रुद्रन’ यांसारख्या चित्रपटांमध्ये काम केले आहे.
