Saif Ali Khan Attacked : बॉलिवूड अभिनेता सैफ अली खान आता त्याच्या घरी परतला आहे. रुग्णालयातून परतल्याचा आनंद साजरा करण्यासाठी काल रात्री त्यांचे घर दिव्यांनी उजळून निघाले होते. साहजिकच, त्याच्या सुरक्षिततेमुळे त्याच्या पत्नी आणि मुलांसह त्याच्या जवळचे प्रत्येकजण आनंदी आहेत. गेला संपूर्ण आठवडा सैफ आणि कुटुंबासाठी कठीण गेला. आता सैफचा एक फोटो सोशल मीडियावर व्हायरल होत आहे, ज्यामध्ये तो ऑटोचालक भजन लालबरोबर दिसत आहे, ज्याने त्याला जखमी अवस्थेत रुग्णालयात नेले आणि त्याच्याकडून पैसेही घेतले नाहीत. रुग्णालयातून डिस्चार्ज देण्यापूर्वी सैफ अली खानने मंगळवारी ऑटोरिक्षा चालकाला वैयक्तिकरित्या फोन केला आणि त्याला पाहताच त्याला मिठी मारली आणि त्याचे आभार मानले.
ऑटो चालकाने त्याची आई शर्मिला टागोर यांच्यासह सैफच्या कुटुंबियांचीही भेट घेतली आणि त्याला रुग्णालयात नेल्याबद्दल सर्वांनी त्याचे आभार मानले. ही छायाचित्रे लीलावती हॉस्पिटलमध्ये घेण्यात आली आहेत, जिथे सैफला १६ जानेवारीच्या पहाटे दाखल करण्यात आले होते. ड्रायव्हरने IANS ला सांगितले, “मला सैफच्या PA चा कॉल आला होता. फोन आधीही आला होता. साडेतीनपर्यंत भेटण्याची वेळ देण्यात आली होती. मी म्हटलं ठीक आहे, पोहोचूया. थोडा उशीरही झाला होता. मी त्यांना चार ते पाच मिनिटे भेटलो. त्याचे कुटुंब होते, सगळेजण मला धन्यवाद देत होते. त्याची आई होती. मी तेवढा टीव्ही पाहत नाही पण त्याची मुलंही उपस्थित होती. त्यानंतर मी सैफ अली खानच्या पायाला स्पर्श करत आशीर्वाद घेतला. त्याच्या आईने हात जोडले आणि मी तिच्या पायाला स्पर्श करत आशीर्वाद घेतला. सर्वांनी माझा आदर केला. एक-दोन छायाचित्रेही काढली”.
आणखी वाचा – रुग्णालयात घेऊन जाणाऱ्या रिक्षावाल्याला भेटला सैफ अली खान, फोटोही काढला अन्…; अभिनेत्याच्या साधेपणाचं कौतुक
सैफ आणि ऑटो-रिक्षा चालकाचे फोटो व्हायरल होत आहेत, ज्यामध्ये दोघे हॉस्पिटलच्या बेडवर बसलेले दिसत आहेत. पांढरा शर्ट आणि गडद चष्मा घालून सैफ हसत आहे. काल जेव्हा तो त्याच्या घरी परतला तेव्हा तो या लूकमध्ये दिसला. त्याच्या मानेवर आणि हातावर पट्टी होती. त्या रात्रीच्या घटनेबद्दल ड्रायव्हरने एएनआयशी संवाद साधला आणि म्हणाला, “मी रात्रीची रिक्षा चालवतो. रात्री दोन ते तीनच्या सुमारास मी पाहिले की एक महिला ऑटो भाड्याने घेण्याचा प्रयत्न करत होती, पण कोणीही रिक्षा थांबवली नाही. मला गेटमधून रिक्षाची हाकही ऐकू आली. मी यू-टर्न घेतला आणि माझी गाडी गेटजवळ थांबवली. रक्ताने माखलेला एक माणूस बाहेर आला, त्याच्याबरोबर आणखी दोन ते तीन लोक होते. त्यांनी त्याला ऑटोमध्ये बसवले आणि लीलावती हॉस्पिटलमध्ये जाण्याचा निर्णय घेतला. मी त्याला तिथे सोडले आणि नंतर मला कळले की तो सैफ अली खान होता. त्याच्या मानेतून आणि पाठीतून रक्तस्त्राव होत असल्याचे मी पाहिले”.
पोलीस अजूनही तपासात व्यस्त आहेत. वांद्रे न्यायालयाने आरोपी शहादाजला ५ दिवसांची पोलीस कोठडी सुनावली आहे. पोलीस त्याची चौकशी करत आहेत. दरम्यान, सैफच्या घराची सुरक्षा वाढवण्यात आली आहे. ज्या इमारतीत सैफ आणि करीना त्यांची मुले जेह आणि तैमूरबरोबर राहतात त्या इमारतीच्या १२व्या मजल्यावरील सर्व एसी डक्ट एरिया जाळीच्या स्क्रीनने सील करण्यात आले आहेत.
