Vaishnavi Hagawane death : पुण्यातील मुळशी तालुक्यातील वैष्णवी हगवणे आत्महत्या प्रकरण आता वाढतच चालले आहे. सासरच्या अमानुष छळाला वैतागून वैष्णवीने आत्महत्येसारखं मोठं पाऊल उचललं. सासरच्या मानसिक आणि शारिरीक त्रासाला कंटाळून वैष्णवी शशांक हगवणे (वय 23) हिने राहत्या घरात गळफास घेऊन आत्महत्या केली आहे. आता वैष्णवी प्रकरणाने न्यायालयाची पायरी चढली आहे. वैष्णवी हगवणे हिच्या मृत्यूनंतर संपूर्ण हगवणे कुटुंब पोलिसांच्या ताब्यात आहे. अशातच, आरोपी हगवणे कुटुंबाच्या वकिलाने पुढे येत मृत वैष्णवीवर आरोपांची आतिषबाजी केली. वैष्णवीच्या चारित्र्यावर शंका उपस्थित करत कोर्टात युक्तिवाद केला. त्यामुळे, आरोपी हगवणेंचे वकील विपुल दुशिंग चर्चेत आले आहेत.
आरोपी हगवणेंचे वकील विपुल दुशिंग यांच्या वक्तव्याने त्यांच्यावर सर्वच स्तरातून टीका होताना पाहायला मिळत आहे. याचबरोबर, आरोपींच्या बाजूने लढणारा वकीलच गुन्हेगार असल्याचं समोर आलं. तीन वर्षांपूर्वी विपुल यांच्यावर सरकारी वकिलाला कॉलर पकडून मारहाण केल्याप्रकरणाचा गुन्हा आहे. न्यायालयाने त्यावेळी अटक पुर्व जामीन दिल्याने दुशींग यांची अटक त्यावेळी टळली होती. वकिलांनी केलेला युक्तिवाद कोणालाच पटला नसून त्यांच्यावर टीकेची झोड उमटवली जात असतानाच आता स्वतः विपुल दुशिंग यांनी या टीकेवर आपली बाजू मांडली आहे.
‘टीव्ही ९’ सह संवाद साधताना त्यांनी या टीकेबाबत भाष्य केलं. ते म्हणाले, “मी वैष्णवी हगवणेच्या चारित्र्यावर बोट ठेवले नाही. तर हगवणे कुटुंबाची बाजू मांडल्याने माझ्यावर टीका होतेय. माणूस म्हणून वैष्णवीसाठी वाईट वाटतंय पण मी माझी ड्युटी करत आहे. माणूस म्हणून त्या मुलींसाठी मला वाईट वाटतंय. लहान वयात तिचा मृत्यू झाला आहे, तिला एक लहान बाळ आहे यासाठी मला वाईट वाटत आहे. आता हे वाईट वाटणं मला माझी ड्युटी करण्यापासून थांबवू शकत नाही. माणूस म्हणून मी वावरतो तर हे प्रकरण ऐकून मला वाईटच वाटतंय. आम्ही आरोपीचा बचाव करत असतो, त्याच्याकडून रीतसर मुद्दे मांडत असतो. आम्ही त्या आरोपीने केलेल्या वाईट कृत्याचा बचाव करत नाही आहोत. आम्ही पुरावे दाखवून आमची बाजू मांडत असतो आता बाकीच्या गोष्टी या न्यायालयावर आधारित आहेत. शेवटी न्यायालयाचा निर्णय सर्वश्रेष्ठ आहे”.
वैष्णवीची टेंडंसी ही सुसाईड करण्याची होती, तिचा एका व्यक्तीबरोबरचा संवादही समोर आला आहे. त्यातून तिने अनेकदा आत्महत्येचा प्रयत्न केला होता. एकदा रॅट पॉइझन खाऊन आणि एकदा गाडीतून उडी मारुन तिने जीवन संपवण्याचा प्रयत्न केला, शिवाय नवऱ्याने चार कानाखाली मारले म्हणजे छळ नाही, असा धक्कादायक दावा राजेंद्र हगवणेंचे वकील विपुल यांनी न्यायालयात केला.
