aashka goradia news : आशका गोराडिया ‘बिग बॉस 6’ मध्ये तिच्या उपस्थितीमुळे खूप चर्चेत आली. आता ती एक यशस्वी उद्योजक आहे. अभिनेत्री सोशल मीडियावर बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात राहत असते. आता मात्र अभिनेत्रीच्या घरात सध्या आनंदाचे वातावरण आहे. तिने पती ब्रेंट गोबेलसोबत तिच्या दुसऱ्या मुलाचे स्वागत केले आहे. दुस-यांदा आई-वडील झाल्यानंतर या जोडप्याने एक पोस्ट शेअर करुन चाहत्यांना ही आनंदाची बातमी दिली आहे.
आशका गोराडियाने तिच्या इंस्टाग्राम हँडलवर तिच्या दुसऱ्या मुलाच्या जन्माची गोड बातमी शेअर केली आहे. त्यांनी एका बाळाचे स्वागत केले आहे. अभिनेत्री आशकानेही तिच्या मुलाचे नाव उघड केले आणि भावुक होत चिठ्ठीत लिहिले की, “1 मे 2026 रोजी आमच्या हृदयात असलेला आमचा मुलगा रिचर्ड थिओडोर गोबल आला. पुन्हा एकदा देवाच्या कार्यावर आमचा विश्वास वाढला. आम्हाला मिळालेल्या सर्व भेटवस्तू आणि चांगल्या बातम्यांसाठी देवाचे आभार”.
आणखी वाचा – ना अवाढव्य खर्च, ना महागडे कपडे; ‘लग्नानंतर होईलच प्रेम’ फेम अभिनेत्रीला लागली हळद, साधेपणाची चर्चा
या आनंदाच्या बातमीनंतर टीव्ही जगतातील अनेक कलाकारांनी कमेंट सेक्शनमध्ये या जोडप्याचे अभिनंदन केले. अभिनेत्री दिव्यांका त्रिपाठीने लिहिले, “तुम्हा दोघांचे अभिनंदन”. अभिनेत्री मौनी रॉयने हार्ट इमोजी शेअर केला आहे. याशिवाय अभिनेत्री सुरभी ज्योती, जेनिफर विंगेटसह अनेक सेलिब्रिटींनी अभिनंदन केले.
अभिनेत्री आशका गोराडियाने 30 एप्रिल रोजी तिची दुसरी गर्भधारणा जाहीर केली होती. आशका गोराडिया आणि ब्रेंट गोबले 2017 मध्ये हिंदू आणि ख्रिश्चन रितीरिवाजांनी लग्न केले होते. या जोडप्याने 2023 मध्ये त्यांच्या पहिल्या मुलाचे, विल्यम अलेक्झांडरचे स्वागत केले. आशका गोराडियाने ‘कुसुम’, ‘लागी तुझसे लगन’ आणि ‘नागिन’ यांसारख्या लोकप्रिय टीव्ही शोमध्ये काम केले आहे. सध्या तिने अभिनयाला अलविदा केला आहे. आशका गोराडिया एक उद्योजिका असून ती तिचा व्यवसाय सांभाळत आहे. ती पती ब्रेंट गोबेलसोबत गोव्यात राहते.
