ankita walawalkar ganesh festival : सध्या सर्वत्र गणरायाचं आगमन झालं आहे. सगळीकडे आनंदाचं वातावरण पसरलेलं पाहायला मिळत आहे. कोकणात तर गणेशोत्सवाची धामधूम निराळीच असल्याचं पाहायला मिळतं. यंदाही कोकणात गणेशोत्सवासाठी चाकरमान्यांनी गर्दी केली आहे. आपल्या सर्वांची कोकणहार्टेड गर्ल अंकिता वालावलकरही लग्नानंतरच्या तिच्या पहिल्या गणेशोत्सवासाठी कोकणात पोहोचली आहे. अंकिता तिचा नवरा संगीत दिग्दर्शक कुणाल भगतसह कोकणात पोहोचली आहे. गणेशोत्सव आणि अंकिता हे समीकरण वेगळंच असलेलं पाहायला मिळालं आहे.
‘बिग बॉस’च्या घरात असतानाही अंकिताला गणेशोत्सवाची खूप आठवण आली होती. घरातील मोठी लेक असल्याने गणेशोत्सव असो वा इतर जबाबदाऱ्या अंकिता स्वतः खूप मेहनत घेते. सगळ्यात ती पुढाकार घेताना दिसते. इतकंच नव्हेतर लग्नाआधीही अंकिताने कुणालला काहीही झालं तरी लग्नानंतर गणेशोत्सवाला माहेरी जावे लागेल अशी अट घातली होती. तर कुणालनेही अंकिताला आपण दोघे मिळून सर्व नीट करु असं वचन दिलं. आता सासरची तयारी झाल्यानंतर अंकिता नवऱ्याला घेऊन देवबागला पोहोचली आहे.
आणखी वाचा – ‘KGF’ फेम सुप्रसिद्ध अभिनेत्याचे वयाच्या ५५ व्या वर्षी निधन, ‘कांतारा’च्या शूटदरम्यान आलेला ब्रेन स्ट्रोक
गणेशोत्सवाच्या संपूर्ण तयारीचा व्हिडीओ अंकिताने तिच्या इंस्टाग्राम अकाउंटवर शेअर केला आहे. व्हिडीओ शेअर करत अंकिता म्हणतेय, “सासरच्या गणपती बाप्पाची तयारी करुन मी निघाले माहेरच्या गणपती बाप्पाची तयारी करण्यासाठी. आता सगळ्यांनाच माहित आहे जेव्हा आम्ही लग्नाचं ठरवत होतो तेव्हाच मी कुणालला म्हटलं होतं की, गणपतीचं काय? तेव्हा तो म्हणाला होता मी सुद्धा येईन आपण मिळून सगळ्या गोष्टी करुया. मुंबईहून गावी गेल्यावर आम्ही लगेच सजावट करायला सुरुवात केली. दुसऱ्या दिवशी गावच्या मार्केटमध्ये जाऊन मी बाकीचं सामान घेऊन आले”.
आणखी वाचा – नेमकं चुकलं काय?, ‘त्या’ व्हिडीओमुळे अर्थव सुदामे चर्चेत की अडचणीत?, सोशल मीडिया इन्फ्लुएन्सरचा माफीनामा
पुढे अंकिता म्हणतेय, “आमचं राहतं घर हे १०० वर्षांपेक्षाही जुनं आहे. पूर्ण मातीचं घर आहे. त्याला बाहेरुन फक्त प्लास्टर केलेलं आहे. त्यामुळे घरात असलेल्या सगळ्या वस्तू या खूप जुन्या आहेत. सजावट पूर्ण झाल्यावर आम्ही गेलो बाप्पाला घरी आणण्यासाठी आणि हो जावयाने मुलाची कमी भरुन काढली हा. पण, खरं सांगू? मुलगी आणि मुलगा असा काहीच फरक नसतो. आपण सेवा कोणाकडून करून घ्यायची हे सुद्धा त्याच्या हातात असतं. त्याची इच्छा. तुम्हाला सर्वांना गणेश चतुर्थीच्या खूप खूप शुभेच्छा! गणपती बाप्पा मोरया”, अशी पोस्ट अंकिताने शेअर केली आहे.
