झी मराठी वाहिनीवरील ‘शिवा’ या मालिकेतून प्रेक्षकांच्या भेटीला येणारी सर्वांची लोकप्रिय अभिनेत्री म्हणजे पुर्वा कौशिक. पुर्वाने आपल्या डॅशिंग अभिनयाने सर्वांना भुरळ घातली आहे. पण नुकतंच तिच्या जवळच्या एका खास व्यक्तीचे निधन झाले आहे आणि याबद्दल तिने सोशल मीडियावर एक भावुक पोस्ट शेअर केली आहे. निधन झालेली ही व्यक्ती अभिनेत्रीची सासू असल्याचे म्हटलं जात आहे. पुर्वाने याबद्दल एक मोठी पोस्ट शेअर करत आपल्या भावना व्यक्त केल्या आहेत. (Purva Kaushik Close Person Death)
त्या खास व्यक्तीबरोबरचे फोटो शेअर करत पुर्वाने या पोस्टमध्ये असं म्हटलं आहे की, “एक नातं जन्माने, परिस्थितीने तयार होतं ते रक्ताच नातं. त्याला आपण नातेवाईक नाव देतो. हे सर्वसामान्य आहेच. पण एखादं नातं हे आपण नैसर्गिकपणे, समजून उमजून सांभाळतो. त्या नात्याला काय नाव द्यायचं, हे कधी मुळात मला कळलंच नाही. तसंच आई तुमचं आणि माझं हे नातं आहे. मन खूप भरून आलं आहे, डोकं जड झालं आहे. काय बोलावं, काय करावं कळत नाही. मग एक जाणवलं, तुम्ही आता असं काही झालं असतं तर काय केलं असंत. तर लिहिलं असतं! तर तसच काहीस वाटतंय. आई मी आयुष्यात खरंच खूप काही चांगलं केलं असावं की तुम्ही आई म्हणून माझ्या आयुष्यात आलात”.
आणखी वाचा – आजीच्या बिघडलेल्या तब्येतीसाठी सूनांनी लीलाला ठरवलं जबाबदार, काय असणार एजेंचा निर्णय?, नात्यात नवीन वळण
यापुढे तिने असं म्हटलं आहे की, “पंचवीशीनंतर माझ्या आयुष्याच्या नवीन पर्वाला सुरुवात झाली. मी माझ्या आयुष्यात पहिल्यांदा तुमच्यासारखी स्त्री पाहिली, अनुभवली. जी माझी मैत्रीण, आई, सासू, बहीण सगळं होतं. मी खूप कधी व्यक्त झाले नाही. माणूस अनुभवाने समृद्ध होत जातो असं म्हणतात. मला माझं माणूसपण जपण्यात तुमचीच साथ होती, आहे आणि आयुष्यभर असेल. आता या क्षणाला कसं, काय, कुठून बोलावं तेही कळत नाहीये. डोळ्यासमोरुन सहा वर्षांचा काळ एकदम एखाद्या एक्स्प्रेससारखा जात आहे”.
यानंतर पुर्वाने असं लिहिलं आहे की, “तुम्ही जिथे कुठे आहात तिथे एकदम छान, शांत, मनमोकळेपणाने राहा. तुमच्या आवडीचे बटाट्याचे चिप्स खा. अमुलचं आईस्क्रीम खा. आता अडवायला येणार नाही. हे खा, ते खाऊ नका, असं म्हणणार नाही. मी तुमच्या माझ्याबरोबरच्या आठवणी कायम माझ्याबरोबर ठेवणार आहे. माणूस म्हणून प्रवास सुरुच राहणार आहे. कळत-नकळत तुमच्यासारखी होण्याचा, असण्याचा प्रयत्न होत असतो, तो आयुष्यभर करत राहणार आहे. माझ्याबरोबर राहा बस. एवढंच. तुमची पूर्वा”.
