अभिनेत्री पूजा सावंत नुकतीच लग्नबंधनात अडकली आहे. पूजाने सिद्धेश चव्हाणसह लग्नगाठ बांधली आहे. अगदी राजेशाही थाटामाटात त्यांचा विवाहसोहळा संपन्न झाला. जवळचे नातेवाईक, कुटुंबीय, कलाकार मंडळी व मित्रपरिवार यांच्या उपस्थितीत हा शाही लग्नसोहळा पार पडला. पूजा सावंत हिने तिच्या इंस्टाग्राम अकाऊंटवरुन त्यांच्या लग्नाचे फोटो शेअर केले आहेत. या फोटोतील त्यांच्या पारंपरिक लूकने साऱ्यांचं लक्ष वेधून घेतलं आहे. पूजाच्या लग्नातील तसेच लग्नापुर्वीच्या फंक्शनमधील अनेक फोटो, व्हिडीओही समोर आले. (Pooja Sawant Siddhesh Chavan Wedding)
गेल्या काही दिवसांपासून पूजाच्या घरी लगीनघाई सुरु होती. यानंतर अगदी पारंपरिक विधींनी पूजा सावंत हिचा लग्न सोहळा पार पडला. या फोटोंमध्ये नववधूवराचा खास पारंपरिक अंदाज पाहायला मिळाला आहे. पूजाच्या लग्नानंतर तिची सासरी पाठवणी करताना साऱ्यांना अश्रू अनावर झाले. तिची बहीण रुचिरा हिने ‘मिस यु’ असं म्हणत पूजाच्या लग्नातील फोटो शेअर केला होता. लग्नानंतर मात्र पूजा तिच्या सासरी रमलेली दिसली. पूजाच्या बहिणीने नुकतेच तिच्या इंस्टाग्राम अकाऊंटवरून पूजाच्या सासरच्या घरातील काही खास फोटो शेअर केले आहेत.
आज पूजाच्या सासरी सत्यनारायणाची पूजा आहे. यासाठी पूजा व सिद्धेश तयार झाले आहेत. पूजाच्या माहेरची मंडळीही तिच्या सासरी पोहोचली आहे. पूजाचे आई-वडीलही लेकीला भेटायला आले आहेत. सत्यनारायणाच्या पूजेचा आशीर्वाद घेताना ते दिसले. अगदी पारंपरिक अंदाजात ही पूजा संपन्न झाली असल्याचं दिसतंय. सत्यनारायणाच्या पूजेसाठी पूजा व सिद्धेशचा पारंपरिक लूक लक्षवेधी ठरला.
पूजाने यावेळी निळ्या रंगाची कॉटनची साडी नेसली होती आणि त्यावर लाल रंगाची शाल घेतली होती. तर सिद्धेश यावेळी कुर्ता पायजमामध्ये दिसला. हातात हिरवा चुडा, गळ्यात मोजकेच दागिने, कानात झुमके अशा सध्या सिंपल लूकमध्ये अभिनेत्री खूपच सुंदर दिसत होती. पूजा व सिद्धेशचा हा पारंपरिक लूक साऱ्यांचं लक्ष वेधून घेत आहे. तर समोर आलेल्या व्हिडीओमध्ये पूजाच्या सासरच्या घराचीही झलक पाहायला मिळत आहे.