मराठमोळी अभिनेत्री प्राची पिसाट सोशल मीडियावर बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात राहते. दरम्यान, अभिनेत्री तिच्या मोहक अंदाजाने नेहमीच प्रेक्षकांची मन जिंकत असते. अशातच प्राचीने तिच्या इंस्टाग्राम अकाउंटवरील एका पोस्टने साऱ्यांचं लक्ष वेधलं आहे. प्राचीने एका मराठमोळ्या अभिनेत्याच्या अश्लील मॅसेजचा थेट स्क्रीनशॉट शेअर करत त्याला जाब विचारला आहे. मराठमोळ्या अभिनेत्याबाबतची ही पोस्ट पाहून सिनेसृष्टीत खळबळ माजली आहे. मराठमोळ्या अभिनेत्याच्या अकाउंटवरुन आलेला हा मॅसेज नेमका त्यांनीच केला आहे का?, की त्यांचं अकाउंट हॅक झालं आहे याबाबत खुलासा होणं अद्याप बाकी आहे. प्राची पिसाटने ज्येष्ठ अभिनेते सुदेश म्हशीलकर यांच्या मॅसेजचा स्क्रीनशॉट शेअर करत त्यांच्यावर आरोप केले आहेत. (Prachi Pisat Has Accused Sudesh Mhashilkar)
‘कोण होतीस तू काय झालीस तू’ या मालिकेमध्ये सध्या सुदेश म्हशीलकर काम करत आहेत. दरम्यान, प्राचीने त्यांच्यावर अश्लील मॅसेज केल्याचा गंभीर आरोप केला आहे. प्राचीने शेअर केलेल्या या स्क्रीनशॉटमध्ये असं दिसून येतंय की, “तुझा नंबर पाठव ना… तुझ्याशी फ्लर्ट करायची इच्छा झालीये… कसली गोड दिसतेस” असा मॅसेज सुदेश यांनी प्राचीला केला आहे. प्राचीने हा स्क्रीन शॉट शेअर करत, “आणि मला हा स्क्रीनशॉट पोस्ट करायची इच्छा झाली. बायकोचा नंबर असलेच. ती ही गोड आहे. बघ जरा तिच्याशी फ्लर्ट करायला जमतंय का?, ही पोस्ट डिलीट कर सांगायला कुठून तरी नंबर मिळवशील आणि कॉल करशीलच”, असं लिहिलं आहे.
मात्र, सुदेश यांच्यावर त्यांच्या चाहत्यांनी विश्वास दाखवला आहे आणि त्यांचं अकाउंट हॅक झालं असावं असं कमेंटमध्ये म्हटलं आहे. एका नेटकऱ्याने प्राचीच्या पोस्टवर कमेंट करत लिहिलं आहे की, “काही लोक यांना खूप वर्षांपासून ओळखतात आणि एवढी १००% खात्री ही आहे की हे नसतील, तू पोलिसात तक्रार दाखल कर, ते सांगतील हॅकर होता की ते स्वतः आहेत”, नेटकऱ्याच्या या कमेंटवर यावर प्राचीने रिप्लाय केलाय की, “मला कोणाला त्रास नाही द्यायचा. मला फक्त दोनदा शांतपणे इग्नोर केल्यानंतर एका मॅच्युअर माणसाला कळलं नाही म्हणून माझ्या पद्धतीने मॅसेज येणं बंद करायचं होतं”, असं म्हटलं आहे.
अभिनेते राजेश देशपांडे यांनी प्राचीच्या पोस्टवर कमेंट करत लिहिलं की, “हे सुदेशने केलेलं नाहीये. तो फेसबुकवर अनेक दिवस लॉगइन नाही आहे आणि तो असा माणूस नाही आहे. काहीतरी गफलत आहे”. त्यावर प्राचीने रिप्लाय करत लिहिलं की, “त्यानेच मेसेज केलाय असं त्यांनी अनेकांना सांगितलंय”. पुढे प्राचीने आणखी एक स्टोरी पोस्ट करत लिहिलं की, “हो असू शकतं. बाय द वे हॅकर मराठी होता आणि अनेक महिने मुलींना मॅसेज करत असेल. बरं झालं माझ्या निमित्ताने कळलं तरी असे मॅसेज करतोय आणि हो, हुशार पण होता. लगेच अनफ्रेंड केलं हॅकरने”, असं म्हणत प्राचीने सुदेश यांच्या मॅसेजचा आणखी एक स्क्रीनशॉट शेअर केला आहे. त्यामध्ये सुदेश यांनी लिहिलं आहे की, “खूपच सेक्सी दिसायला लागलीयेस हल्ली…वाह”. सध्या हे प्रकरण चर्चेत आलेलं पाहायला मिळत आहे.
