Aditi Sarangdhar : स्वामींची प्रचिती आली असं अनेकदा कानावर येतं. असे अनेक बरेच कलाकार आहेत ज्यांनी आजवर स्वामींबाबत त्यांना आलेले अनुभव शेअर केले आहेत. अशातच आता एका मराठमोळ्या अभिनेत्रीनेही स्वामींचा एक अनुभव नुकत्याच दिलेल्या मुलाखतीत शेअर केला. ही अभिनेत्री म्हणजे अदिती सारंगधर. अदितीने आजवर अनेक मराठी मालिका, चित्रपटांमधून महत्त्वपूर्ण भूमिका साकारत रसिकांच्या मनात घर केलं आहे. सोशल मिडियावरही ती बऱ्यापैकी सक्रिय असते. अशातच अदितीने नुकत्याच दिलेल्या मुलाखतीत तिला आलेला स्वामींचा अनुभव शेअर केला आणि ती स्वामीभक्त असल्याचं स्पष्ट केलं.
अदितीने ‘मज्जा पिंक’ चॅनेलच्या ‘हीलिंग सर्कल विथ वनश्री’ या पॉडकास्टला भेट दिली. यावेळी तिने तिच्या आयुष्यातील अनेक अनुभव, किस्से सांगितले. यावेळी तिने स्वामींचा अनुभव सांगितला. अदिती म्हणाली, “माझा अनुभव आहे, जो मी कधीच सार्वजनिकरित्या शेअर नाही केला. माझं कॉलेज संपलेलं आणि वादळवाटचं शूटिंग सुरु झालेलं. मी परीक्षा देऊन येत होते आणि खूप रडत होते. ट्रेनमध्ये खिडकीपाशी बसून रडत होते. समोर एक अनोळखी व्यक्ती होती, तिने मला विचारलं काय झालं? तिने असं विचारताच मला आणखी रडू आलं. तर ती म्हणाली, ‘काही नाही गं! स्वामी बरं करतील.’ ती स्वामींच्या मठात जाऊन आलेली. ती माझी नंतर चांगली मैत्रीण झाली. भारती नाव तिचं. तिने मला स्वामींचा अंगारा दिला, प्रसाद दिला आणि मी परीक्षा दिली. माझं ग्रॅज्युएशन झालं”.
आणखी वाचा – घटस्फोटाच्या तीन महिन्यांतच मराठी अभिनेत्री अडकणार लग्नबंधनात, केळवणाचा व्हिडीओ समोर
ती पुढे म्हणाली, “मी कठीण काळात असताना मला भारतीचा फोन आला. आम्ही नवीन घरी शिफ्ट झालो, घरी जेवायलाच ये असं तिनं मला सांगितलं. तिने मला स्वामींची छोटुशी मूर्ती दिली. ती मूर्ती घरात आणली, स्थापना केली. हळूहळू गोष्टी बदलायला लागल्या. माझा त्यांच्यावर पूर्ण विश्वास आहे. तीच मूर्ती मी आताच्या घरात आणली आणि ती मूर्ती आमच्या एका मावशींच्या हातून तुटली. मला इतकं वाईट वाटलं, मी भारतीला रडत रडत फोन केला. ती बँकेत कामाला होती, तिने हाफ-डे घेतला. स्वामींची नवीन मूर्ती घेतली, मठात जाऊन त्यावर अभिषेक केला आणि ती मूर्ती घेऊन दुपारी माझ्याकडे आली. स्वामींना यायचं होतं माझ्या घरी. अजूनही कठीण परिस्थिती आली तरी ते असतात माझ्यासोबत”, असा स्वामींचा अनुभव सांगताना अदितीने पुढे सांगितलं.
