Girish Pardeshi Video On Fraud Alert : गेल्या काही दिवसांत ऑनलाईन फसवणुकीचे प्रकार मोठ्या प्रमाणात होताना दिसत आहेत. काही वर्षांपूर्वी घरात घुसून केली जाणारी चोरी आता थेट मोबाईलमध्ये घुसून केली जात आहे. आणि यांत अनेकजण भरडले जात आहेत. कित्येक सर्वसामान्यांचे बँक अकाउंट्स रिकामी झाले आहेत. काहीजण वेळीच सावध होतात तर काही या घोटाळ्यात अडकले जातात. या घोटाळ्याप्रकरणी मराठमोळ्या अभिनेत्याने व्हिडीओ शेअर करत नागरिकांना आवाहन केलं आहे. अभिनेता गिरीश परदेशीने सोशल मीडियावर एक व्हिडीओ शेअर करत चाहत्यांना सावध केले आहे. ऑनलाईन फ्रॉडची शिकार होण्यापासून अभिनेत्याची पत्नी बचावली आहे. आणि त्यांचे मोठे नुकसान होता होता राहिले आहे. या संदर्भातील एक व्हिडीओ शेअर करत अभिनेत्याने सावधतेचा इशारा दिला आहे.
गिरीश परदेशीने व्हिडीओ शेअर करत असं म्हटलं की, “मित्रांनो एक धोक्याची सूचना आहे. आता थोड्या वेळापूर्वी माझी पत्नी प्रतिक्षाच्या फोनवर एका बाईने फोन करुन सांगितलं की, मी (अभिनेत्याने स्वत:) प्रतिक्षाला १३ हजार रुपये गुगल पेवर पाठवयाला सांगितले आहेत. त्या बाईने प्रतिक्षाच्या गुगल पेवर पहिल्यांदा १० हजार पाठवले आणि मग तीन हजारऐवजी ३० हजार रुपये पाठवले. त्या दोन्ही व्यवहारांचे स्क्रिनशॉट तिला व्हाट्सअप केले. तिने पुन्हा फोन करुन माझ्या पत्नीला सांगितले की, तिने चष्मा घातला नव्हता आणि म्हणून तीन हजारांऐवजी ३० हजार पाठवले आहेत. मी तुम्हाला स्क्रिनशॉट पाठवला आहे, माझा स्कॅनर कोडही पाठवते आणि तुम्ही मला उरलेले २७ हजार रुपये पाठवा”.
आणखी वाचा – पायलट भाचीकडून स्पेशल Announcement, पद्मश्री अशोक सराफ यांचे विमानप्रवासात कौतुक, म्हणाली, “आजचा प्रवास…”
अभिनेत्याने पुढे असेही सांगितले की, “माझ्या पत्नीने संबंधित महिलेला स्पष्ट सांगितले की जरी Gpay वर व्यवहार दिसतोय, पण खात्यात असे पैसे जमा झालेले नाहीत. तेव्हा त्या महिलेने प्रतिक्षा यांना खात्यात किती रक्कम आहे, असा सवाल केला. जेव्हा त्याच्या पत्नीने खात्यातील रक्कम सांगण्यास नकार दिला, तेव्हा त्या महिलेने फोन कट केला. यानंतर माझ्या पत्नीने त्या क्रमांकावर वारंवार कॉल करण्याचा प्रयत्न केला, पण फोन कायम व्यग्र येत होता. पोलिसांकडे संपर्क साधल्यानंतर समजले की असे अनेक फ्रॉड सध्या घडत आहेत”.
आणखी वाचा – ज्येष्ठ अभिनेत्याच्या अश्लील मॅसेज प्रकरणी प्राची पिसाटचा युटर्न?, नेटकरीही संभ्रमात, म्हणाली, “चुकीचे…”
पुढे त्याने सतर्कतेचा इशारा देत म्हटलं की, “सतर्क राहा, आम्ही राहिलो म्हणून वाचलो! त्यांच्याकडे तुमच्या घरच्यांचे नंबर्स असतात आणि नंतर जेव्हा आम्ही त्यांना ब्लॉक केले तेव्हा तो सर्व डाटा आपोआप निघून गेला. ते पैसे परत पाठवायला खूप घाई करतात आणि तो परत नंबर लागत नाहीत कधीच. जास्तीत जास्त पसरवा”. गिरीशने हा व्हिडीओ शेअर करत दाखवलं की, फ्रॉड करणाऱ्यांकडून पैसे पाठवले जात नाहीतर तर स्प्लिट रिक्वेस्ट पाठवली जाते. आणि आपल्याला पैसे आल्याचा मॅसेज येतो मात्र खात्यात रक्कम जमा होत नाही. गिरीशने हा व्हिडीओ शेअर करत अशा भामट्यांपासून सावध राहण्याचे आवाहन केले आहे.
