सध्या सर्वत्र ‘मुंज्या’ या रहस्यमय कॉमेडी चित्रपटाची चर्चा सुरु असलेली पाहायला मिळत आहे. अल्पावधीतच या चित्रपटाने चमत्कार केला आहे. बॉक्स ऑफिसवर या चित्रपटाने बक्कळ कमाई केलेली पाहायला मिळत आहे. चित्रपटात कोणताही मोठा स्टार किंवा प्रसिद्ध चेहरा नसतानाही चित्रपटाने बक्कळ कमाई केली. पहिल्याच दिवशी अपेक्षेपेक्षा दुप्पट कमाई करत चित्रपटाने दुसऱ्या दिवशीही प्रेक्षकांना आश्चर्यचकित केले. दुसरीकडे, राजकुमार राव व जान्हवी कपूर यांचा ‘मिस्टर अँड मिसेस माही’ हा चित्रपटदेखील चांगली कमाई करत आहे. (Munjya Movie)
सध्या या चित्रपटाला चांगला प्रतिसाद मिळत आहे. पण ‘मुंज्या’ आता ‘मिस्टर अँड मिसेस माही’ला टक्कर देताना दिसत आहे. ७ जून रोजी प्रदर्शित झालेल्या हॉरर कॉमेडी ‘मुंज्या’ चित्रपटाने ३.७५ कोटींची ओपनिंग केली होती. या चित्रपटाची प्रसिद्धी प्रेक्षकांनीच केली आणि याचा खूप फायदा झाला. त्यामुळे चित्रपटाच्या कथेचे कौतुकही होत आहे. त्यामुळेच ‘मुंज्या’ प्रेक्षकांना थिएटरकडे आकर्षित करण्यात यशस्वी होत आहे.
या चित्रपटात कोणताही मोठा स्टार नाही, तरीही या चित्रपटाची कमाई दुसऱ्याच दिवशी प्रचंड दुप्पट झाली. Sacnilk च्या रिपोर्टनुसार, ‘मुंज्या’ ने दुसऱ्या दिवशी म्हणजे ८ जून रोजी जवळपास ६.७५ कोटी रुपयांचा व्यवसाय केला. अशा प्रकारे दोन दिवसांचे एकूण कलेक्शन १०.७५ कोटी रुपये झाले आहे. दुस-या दिवशी, ‘मुंज्या’ने सकाळच्या शोमध्ये १३.७९% इतकी जागा भरली होती. जी दुपारच्या शोमध्ये २८.८१% पर्यंत वाढली आणि नंतर रात्रीच्या शोमध्ये ४६.५३% पर्यंत पोहोचली.
‘मुंज्या’चे दिग्दर्शन आदित्य सरपोतदार यांनी केले आहे. तर ‘स्त्री’ आणि ‘भेडिया’ सारखे हिट चित्रपट देणारे दिनेश विजन आणि अमर कौशिक यांनी या चित्रपटाची निर्मिती केली आहे. मोना सिंग, शर्वरी वाघ आणि अभय सिंग या चित्रपटात मुख्य भूमिकेत आहेत. रिपोर्ट्सनुसार, चित्रपटाचे बजेट ३० कोटी रुपये आहे.