Purna Aaji new entry : ‘ठरलं तर मग’ ही मालिका टीआरपीच्या शर्यतीत अव्वल स्थानावर असलेली पाहायला मिळतेय. या मालिकेतील सगळेच कलाकार त्यांच्या भूमिकेने आणि अभिनयाने रसिक प्रेक्षकांच्या मनात घर करुन राहिले. मालिकेतील पूर्णा आजी ही भूमिका साकारणाऱ्या ज्येष्ठ अभिनेत्री ज्योती चांदेकर यांचे निधन झाले तेव्हा मालिकेतील सगळ्यांनाच मोठा धक्का बसला. ज्योती यांच्या निधनानंतर अनेकांच्या डोळ्यांत पाणी पाहायला मिळालं. पण शो मस्ट गो ऑन म्हणत ही भूमिका पुन्हा ‘स्टार प्रवाह’ वाहिनीने आणि ‘ठरलं तर मग’च्या निर्मात्यांनी पुन्हा भेटीस आणली आहे.
गेल्या अनेक दिवसांपासून ही भूमिका कोण साकारणार याची साऱ्यांनाच उत्सुकता लागून राहिली होती. अखेर आता नव्या पूर्णा आजी कोण आहेत हे समोर आलं आहे. यापूर्वी स्टार प्रवाहने पाठमोऱ्या पूर्णा आजीच्या भूमिकेत एक व्हिडीओ शेअर करत ही उत्सुकता वाढविली होती. “अन्नपूर्णा निवासात पुन्हा एकदा आनंद घेऊन येणार पूर्णाआजी” असं कॅप्शन देत हा व्हिडीओ समोर आलेला. सदर प्रोमोवर आलेल्या कमेंटने या भूमिकेत रोहिणी हट्टंगडी दिसणार असल्याचं स्पष्ट केलं.
अखेर ‘स्टार प्रवाह’ वाहिनीने आणि मालिकेच्या टीमने पूर्णा आजी ही भूमिका रोहिणी हट्टंगडी साकारणार असल्याच्या बातमीवर शिक्कामोर्तब केलं आहे. रोहिणी हट्टंगडी ठरलं तर मग मालिकेतून पूर्णा आजीच्या भूमिकेत दिसणार आहेत. यापूर्वी रोहिणी हट्टंगडी यांनी अनेक मराठी मालिकांमधून महत्त्वपूर्ण भूमिका साकारल्या. आता पुन्हा एकदा त्यांनी ठरलं तर मग मालिकेतून मालिकाविश्वात कमबॅक केलं आहे.
आणखी वाचा – Video : कुटुंबाचं पत्र पाहून प्रणित मोरे ढसाढसा रडला आणि…; इतर स्पर्धकांच्याही डोळ्यांत पाणी
अभिनेत्री ज्योती चांदेकर यांना आजही त्यांचा चाहतावर्ग मिस करतोय. अर्थात त्यांची जागा कोणीही घेऊ शकत नाही. पण मालिकेच्या कथानकाच्या गरजेनुसार ही भूमिका मालिकेत परत आणणं आवश्यक होतं, त्यानुसार आता मालिकेत पूर्णा आजी ही भूमिका अभिनेत्री रोहिणी हट्टंगडी यांच्या वाट्याला आली आहे. अर्थात रोहिणी ताई ही भूमिका उत्तम साकारत प्रेक्षकांच्या मनात घर करतील यांत शंकाच नाही.
