कलाकार मंडळी नेहमीच त्यांच्या मूळ गावाबद्दलच्या आठवणी चाहत्यांसह शेअर करत असतात. अशातच एका मराठमोळ्या दिग्दर्शकाने त्याच्या मूळ गावच्या शेअर केलेल्या व्हिडीओने साऱ्यांचं लक्ष वेधून घेतलं आहे. सिनेसृष्टीतील बरीच कलाकार मंडळी ही कोकणातील आहेत. ही कलाकार मंडळी त्यांच्या कोकण दौऱ्याचे अनेक फोटो, व्हिडीओ त्यांच्या चाहत्यांसह शेअर करताना दिसतात. अशातच दिग्दर्शक रवी जाधव यांनी सोशल मीडियावरुन त्यांच्या गावचा व्हिडीओ शेअर केला आहे. (Ravi Jadhav Home)
मराठी चित्रपटसृष्टीतील प्रसिद्ध दिग्दर्शक रवी जाधव यांनी त्यांच्या चित्रपटांनी प्रेक्षकांची मनं जिंकली आहेत. रवी जाधव हे सोशल मीडियावर नेहमीच विविध पोस्ट शेअर करतात. मराठी चित्रपटसृष्टीतील लोकप्रिय निर्माते-दिग्दर्शक म्हणून रवी जाधव यांना ओळखलं जातं. ‘टाईमपास’, ‘बालक पालक’ ते नुकतीच प्रदर्शित झालेली सुश्मिता सेनची ‘ताली’ वेबसीरिज या त्यांच्या प्रत्येक कलाकृतीचं प्रेक्षकांनी भरभरुन कौतुक केलं. अशातच रवी जाधव यांनी माघी गणेशोत्सवानिमित्त त्यांच्या गावच्या घराचा एक व्हिडीओ शेअर केला आहे.
“गावी गेलं की मन बेभान होतं आणि गहीवरतही. माघी गणेशोत्सवाला संगमेश्वर तालुक्यातील कासे या माझ्या गावी गेलं की पुन्हा मुंबईला येऊच नये असं वाटतं”, असं कॅप्शन देत त्यांनी त्यांच्या गावच्या घराची झलक दाखवली आहे. शिवाय रवी जाधव यांनी माघी गणेशोत्सवानिमित्त भजन करतानाचे, आरतीचे अनेक फोटो शेअर केले. यावेळी त्यांनी घराबाहेरचा निसर्गरम्य परिसरही दाखवला. अगदी निसर्गाच्या कुशीत वसलेलं कौलारू घर खूप खास आहे. घराच्या समोर तुळस असून याने घराची शोभा वाढलेली पाहायला मिळत आहे. शिवाय व्हिडिओमधून त्यांनी नदी, डोंगराची झलक दाखविली आहे.
रवी जाधव यांचा ‘मैं अटल हूं’ हा चित्रपट काही दिवसांपूर्वी रिलीज झाला. या चित्रपटात अभिनेते पंकज त्रिपाठी यांनी अटल बिहारी वाजपेयी यांची भूमिका साकारली. तसेच काही महिन्यांपूर्वी रवी जाधव यांची ‘ताली’ ही वेब सीरिज रिलीज झाली. या वेबसीरिजचं अनेकांनी कौतुक केलं.