बॉलिवूडमधील अष्टपैलू अभिनेत्री तसेच स्पष्टवक्तेपणामुळे नेहमीच चर्चेत असणारी अभिनेत्री म्हणजे कंगना रणौत. कंगनाने आजवर अनेक हिट चित्रपटांमधून आपल्या दमदार अभिनयाने प्रेक्षकांच्या मनावर राज्य केले आहे. अभिनेत्री तिच्या व्यावसायिक आयुष्याबरोबरच तिच्या वैयक्तिक आयुष्यामुळे चर्चेत असते. मात्र ही अभिनेत्री केव्हा लग्नबंधनात अडकणार याकडे साऱ्यांचं लक्ष लागून राहिलेलं आहे. अभिनेत्रीचे लग्न कधी होणार याची चाहत्यांची प्रतीक्षा आता संपणार आहे. खरंतर, बॉलिवूडची ‘क्वीन’ लवकरच लग्न करणार असल्याच्या अफवा सर्वत्र पसरल्या आहेत. (Kangana Ranaut Marriage)
Reddit वर एक रिपोर्ट व्हायरल होत आहे ज्यानुसार कंगना रणौत तिच्या लग्नासाठी खास ड्रेस बनवत असल्याचं समोर आलं आहे. रिपोर्टनुसार, हा डिझायनर फारसा प्रसिद्ध नसला तरी ती तिच्या लग्नाचा ड्रेस फॅशन इंडस्ट्रीतील एका डिझायनरकडून तयार करून घेत आहे. कंगना कोणाशी लग्न करतेय हे अद्याप माहीत नसून या वृत्तावर कंगना रणौतकडून कोणतीही प्रतिक्रिया आलेली नाही, मात्र या वृत्तांमुळे नेटकऱ्यांमध्ये चांगलीच खळबळ उडाली आहे.
याआधीही ‘टाइम्स नाऊ’ बरोबरच्या संभाषणात कंगना रणौतने तिच्या लग्नाबाबत व तिच्या आयुष्याबाबत भाष्य केलं होतं. अभिनेत्रीने खुलासा केला की, तिला नेहमीच स्वतःचे कुटुंब असावे आणि ५ वर्षांच्या आत लग्न करायचे होते. ती म्हणाली होती, “प्रत्येक मुलीचं स्वप्न असतं की लग्न करून आपलं कुटुंब असेल. मी एक संपूर्ण कौटुंबिक व्यक्ती आहे, माझ्यासाठी हे खूप महत्वाचे आहे. मला लग्न करून एक कुटुंब तयार करायचे आहे आणि ते पाच वर्षानंतर होईल. अरेंज व लव्ह मॅरेज यांचं मिश्रण असेल तर ते चांगलं होईल”.
कंगना रणौत तिच्या पूर्वीच्या रिलेशनशिपमुळेही चर्चेत असते. प्रत्येक मुद्द्यावर नेहमी स्पष्ट मत देणाऱ्या विवाहित आदित्य पांचोलीबरोबर कंगनाचे कथित नातेसंबंधही खूप वादात सापडले. त्यानंतर अभिनेत्रीने तिच्या ‘राझ २’मधील तिचा सहकलाकार अध्यायन सुमनला डेट केले, परंतु त्यांचे नाते फार काळ टिकले नाही. कंगना रणौतच्या कामाबद्दल बोलायचे झाले तर, ही अभिनेत्री आता ‘इमर्जन्सी’ या राजकीय नाटकातून मोठया पडद्यावर झळकणार आहे. कंगना रणौतने या चित्रपटात दिवंगत पंतप्रधान इंदिरा गांधी यांची भूमिका साकारत आहे.
