शाळा, कॉलेज, नोकरी, करिअरमध्ये मुलांची गगनभरारी त्यांच्या पालकांना भारावून टाकणारी असते. मुलांना यशस्वी होताना बघून आई-वडिलांना काही वेगळाच आनंद होतो. प्रत्येक यशाच्या पायरीवर पालकांचाही तितकाच खारीचा वाटा असतो. मुलांची शिक्षणात प्रगती आणि त्यांचं यश सर्वसामान्य पालकांप्रमाणेच सेलिब्रिटी मंडळीही सेलिब्रेट करतात. व्यग्र वेळापत्रकामधून जमेल तितका वेळ काढत मुलांच्या प्रत्येक यशामध्ये सहभाग घेतात. असंच काहीसं आता सुप्रसिद्ध अभिनेत्री अश्विनी भावे यांच्याबाबत घडलं आहे. अश्विनी यांनी लेकीबरोबरचा फोटो शेअर करत सगळ्यांना आनंदाची बातमी दिली आहे. (ashvini bhave daughter graduate ceremony)
अश्विनी यांनी करिअर करत असताना कुटुंबालाही तितकंच प्राधान्य दिलं. किशोर बोपर्डीकर यांच्याशी लग्न झाल्यानंतर त्या अमेरिकेमध्ये स्थायिक झाल्या. त्यांनी संसार, कुटुंब, मुलांना सांभाळत त्यांच्या अभिनयाची आवड पूर्ण केली. आता त्यांनी आयुष्यातील एक सुवर्ण क्षण अनुभवला आहे. अश्विनी यांची मुलगी साची पदवीधर झाली आहे. याचदरम्यानचे काही फोटो आणि पोस्ट त्यांनी सोशल मीडिया अकाऊंटद्वारे शेअर केली आहे.
आणखी वाचा – “फक्त प्रसिद्धी व नाव हवंय आणि…”, चर्चेत राहण्यासाठी गोविंदाच्या पत्नीची धडपड, म्हणाली, “आडनाव काढलं कारण…”
अश्विनी यांनी पोस्ट शेअर करत लेकीचं कौतुकही केलं. त्या म्हणाल्या, “अभिनंदन माय डियर. ABC पासून सुरु झालेला प्रवास आज इथवर पोहोचला आहे. आम्हा दोघांना तुझा खूप अभिमान आहे. हा आनंद शब्दांमध्ये व्यक्त करता न येणारा आहे”. अश्विनी यांनी मोजक्याच शब्दांमध्ये लेकीचं भरभरुन कौतुक केलं. तसेच त्यांच्या या पोस्टवर अनेक सेलिब्रिटी मंडळींनी कमेंट करत अभिनंदनाचा वर्षाव केला.
लॉस एंजेलिसमधील कॅलिफोर्निया विद्यापिठातून साची पदवीधर झाली आहे. अश्विनी यांच्या लेकीने बायोमेडिकल रिसर्चमध्ये तिचं शिक्षण उत्तमरित्या पूर्ण केलं. लेकीला अभिमानाने जवळ घेत अश्विनी यांनी फोटोसाठी सुंदर पोझ दिल्या. फोटो पाहून अभिनेत्रींनीही कमेंट केल्या आहेत. खूप खूप अभिनंद, साचीच्या पुढील वाटचालीसाठी शुभेच्छा, कुटुंबासाठी अभिमानाचा क्षण, साचीच्या पालकांना तिचा खूप अभिमान आहे अशा विविध कमेंट्स अनेकांनी केल्या आहेत.
