अनंत अंबानी व राधिका मर्चंट यांच्या प्री-वेडिंग सोहळ्याला बॉलिवूड सेलिब्रिटींनी हजेरी लावत या सोहळ्याची शोभा वाढविली. सलग तीन दिवस सुरु असलेल्या या सोहळ्यात बॉलिवूड कलाकारांनी भरजरी कपडे परिधान करत हजेरी लावली. रिहाना, एकॉन, अरिजित सिंग, दिलजीत दोसांझ, श्रेया घोषाल या गायकांच्या सुरांवर कलाकार मंडळींनी नृत्य केले. मात्र, या सोहळ्यातून काही कलाकारांची नावे वगळली असल्याचं समोर आलं आहे. हृतिक रोशन या सोहळ्याला त्याच्या तब्येतीच्या समस्येमुळे येऊ शकला नाही. (Anant Ambani-Radhika Merchant Pre Wedding in Jamnagar)
खरं तर, अनंत व राधिका यांच्या प्री-वेडिंगच्या काही दिवस आधी, हृतिक रोशनने क्रॅचच्या मदतीने एक फोटो शेअर केला होता, ज्यामध्ये त्याच्या स्नायूंना ताण आला होता आणि त्याला वेदना होत असल्याचे समोर आले होते. गेल्या वर्षी अनंत अंबानी व राधिका मर्चंटच्या साखरपुडा समारंभाला उपस्थित असलेला करण लग्नाआधीच्या सोहळ्यामध्ये दिसला नाही. NMACC उद्घाटन सोहळ्याला निक जोनाससह आलेली प्रियांका चोप्रा जामनगरमधील समारंभात सहभागी झाली नाही. मात्र, तिची आई मधु चोप्रा या कार्यक्रमाला उपस्थित होती.
गेल्या महिन्यात आई-बाबा झालेले अनुष्का शर्मा व विराट कोहली सध्या लंडनमध्ये आहेत. लंडनमध्ये ते त्यांच्या बाळाची काळजी घेण्यात व्यस्त आहेत. या कारणामुळे ते दोघेही अनंत व राधिकाच्या प्री-वेडिंगला उपस्थित राहू शकले नाही. या प्री-वेडिंग फंक्शनला काजोलही दिसली नाही, पण अजय देवगण व त्याची लेक न्यासा यांनी तिची अनुपस्थिती भरुन काढली. तसेच अंबानीच्या या प्री-वेडिंग फंक्शनमध्ये देओल कुटुंबातील एकही सदस्य उपस्थित नव्हता. तसेच या सोहळ्याला शिल्पा शेट्टी व तिचे कुटुंब दिसले नाही. कंगना राणौतही या फंक्शनल एकही दिवस दिसली नाही. अद्याप या कलाकार मंडळींच्या गैरहजेरीचं कारण समोर आलं नाही. तर त्यापैकी काहींना कदाचित आमंत्रित केले गेले नव्हते.
मात्र, जी कलाकार मंडळी उपस्थित होते त्यांच्यासाठी हा संस्मरणीय कार्यक्रम होता. सलमान खान, शाहरुख खान व आमिर खान यांनी आपल्या अभिनयाने उपस्थितांचं मनोरंजन केलं. अंबानी कुटुंबातील सदस्यांनीही या कार्यक्रमात परफॉर्म केले.
