Raqesh Bapat shares photos of Ganpati visarjan : कलाकारांच्या घराचा बाप्पा पाहण्याची साऱ्यांनाच उत्सुकता लागून राहिलेली असते. बरेच असे कलाकार आहेत जे नेहमीच स्वतःच्या हाताने घडवलेल्या गणेशमूर्तीची आराधना करतात. यांत एक नाव आवर्जून घेतलं जातं ते म्हणजे हिंदी, मराठी मालिकांमध्ये महत्त्वपूर्ण भूमिकेत दिसलेला राकेश बापट. गणपती जवळ आले की सगळ्यांच्या नजरा या राकेशच्या इंस्टाग्राम अकाऊंटकडे लागून राहिलेल्या असतात. दरवर्षी न चुकता राकेश स्वतःच्या हाताने मूर्ती घडवतो. राकेशने दरवर्षीप्रमाणे यंदाही स्वत:च्या हाताने गणपतीची मूर्ती बनवली होती. यावर्षीही दीड दिवसासाठी त्याच्याकडे बाप्पा विराजमान झाले होते.
‘नवरी मिळे हिटलरला’ फेम अभिनेत्याने बाप्पाच्या विसर्जनाचे काही फोटो-व्हिडिओ सोशल मीडियावर शेअर केले आहेत. राकेशसह त्याचे कुटुंबीय आणि मित्र परिवार बाप्पांना निरोप देण्यासाठी उपस्थित होते. पहिल्या फोटोत अभिनेता गणपती बाप्पाची आरती करताना दिसत आहे. दुसऱ्या फोटोमध्ये तो गणपतीच्या मूर्तीला घराबाहेर घेऊन जाताना दिसत आहे. त्यानंतरच्या फोटोत तो कुटुंब व मित्र परिवारासह गणपती बाप्पा मोरया असा जयघोष करताना दिसत आहे. काही फोटोंमध्ये तो प्रेमाने बाप्पाला निरोप देताना दिसत आहे.
राकेशने हे फोटो पोस्ट करत ‘गुडबाय गणू… पुढच्या वर्षी भेटू’. #thankyou #GanpatiBappaMorya #grateful असे हॅशटॅगही त्याने या पोस्टमध्ये लिहिले आहेत. राकेशची ही पोस्ट एका विशेष फोटोमुळे अधिक चर्चेत आली आहे. तो फोटो म्हणजे राकेशची पूर्वाश्रमीची पत्नी रिद्धी डोगरामुळे. राकेशची पूर्वाश्रमीची पत्नी रिद्धीनेही त्याच्या घरी गणरायाच्या दर्शनाला हजेरी लावली. राकेशच्या घरच्या गणपती बाप्पांच्या विसर्जनामध्ये रिद्धी मोठ्या उत्साहाने सहभागी झाली होती.
आणखी वाचा – “विनंती समजा किंवा चेतावणी”, ‘ठरलं तर…’च्या एपिसोडवरुन फॅनपेजेसवर भडकली जुई गडकरी, म्हणाली, “नियमांचं…”
रिद्धी आणि राकेश यांनी २०११ साली लग्न केले होते, पण ८ वर्षांच्या संसारानंतर २०१९ मध्ये त्यांनी घटस्फोट घेतला. रिद्धी आणि राकेश यांच्यातील मैत्री आजही कायम असल्याचे पाहून काहींनी आश्चर्य व्यक्त केले, तर ते काहींनी ते एकमेकांचा आदर करतात असेही म्हटले आहे.
