आमिर खानने मुंबईतील आलिशान भागात असलेल्या पाली हिलमध्ये एक मोठी मालमत्ता खरेदी केली असल्याची चर्चा आहे. अभिनेत्याने पाली हिल परिसरातील एका इमारतीत अपार्टमेंट खरेदी केले आहे. त्याची किंमत नऊ कोटींहून अधिक असल्याचे सांगण्यात येत आहे.स्क्वेअर यार्डसकडे आमिरच्या नवीन अपार्टमेंटची कागदपत्रे आहेत. ज्यामध्ये अपार्टमेंटची किंमत ९.७५ कोटी रुपये असल्याचे नमूद करण्यात आले आहे. हे अपार्टमेंट आधीच तयार असून १,०२७ चौरस फूट आहे. हा करार २५ जून रोजी अंतिम झाला, ज्यासाठी आमिर खानने ३० हजार रुपये नोंदणी शुल्क आणि ५८.५ लाख रुपये मुद्रांक शुल्क भरले. (Aamir Khan Property)
आमिरचे हे नवीन अपार्टमेंट पाली हिल परिसरात बेला विस्टा अपार्टमेंट्स नावाच्या एका अत्याधुनिक इमारतीत आहे. बेला विस्टा अपार्टमेंट्स आणि मरीना अपार्टमेंट्समध्ये आमिर खानच्या आधीच अनेक मालमत्ता आहेत. याशिवाय अभिनेत्याचे वांद्रे येथील समुद्र किनाऱ्यावर ५ हजार स्क्वेअरमध्ये एक आलिशान घर आहे. त्यात दोन मजले आहेत. घरात एक मोठा भाग आहे, जिथे पार्टी व कार्यक्रम आरामात आयोजित केले जाऊ शकतात.
२०१३ मध्ये आमिर खानने पाचगणीमध्ये सात कोटी रुपयांना एक फार्महाऊस खरेदी केले होते, जे दोन एकरमध्ये पसरले आहे. याशिवाय आमिर खानने काही व्यावसायिक मालमत्तांमध्येही गुंतवणूक केली आहे. उत्तर प्रदेशातील हरदोई येथे आमिर खानची २२ घरे असल्याचा दावा काही रिपोर्ट्समध्ये करण्यात आला आहे. रिपोर्ट्सनुसार, आमिर खानची एकूण संपत्ती १८६२ कोटी रुपये आहे
आमिर खानच्या कामाबद्दल बोलायचे झाले तर, आमिर खान सध्या ‘सीतारे जमीन पर’ चित्रपटाच्या शूटिंगमध्ये व्यस्त आहे. यंदाच्या ख्रिसमसच्या मुहूर्तावर हा चित्रपट प्रदर्शित होऊ शकतो. आमिर याआधी २०२२ मध्ये प्रदर्शित झालेल्या ‘लाल सिंह चड्ढा’ या चित्रपटात दिसला होता, जो खूप फ्लॉप झाला होता.