‘आनंदी गोपाळ’, ‘डबलसीट’, ‘टाईमप्लीज’, ‘क्लासमेट्स’, ‘लोकमान्य’, ‘लग्न पहावे करून’ अशा अनेक बऱ्याच चित्रपटांचे दिग्ददर्शन करुन समीरने प्रेक्षकांची मनं जिंकली आहेत. समीर अनेकदा त्याच्या सोशल मीडियाच्या अकाऊंटवरुन सामाजिक आणि राजकीय विषयावरही भाष्य करत असतो. अशातच त्याने नुकत्याच वसईमध्ये झालेल्या तरुणीच्या हत्येबद्दल सोशल मीडियाद्वारे भाष्य केलं आहे.
वसईतील गावराई पाडा येथे मंगळवार सकाळी थरकाप उडवणारी घटना घडली. भररस्त्यात एका प्रियकराने आपल्या प्रेयसीवर लोखंडी पान्याने सपासप वार करून तिची निर्घृण हत्या केली. या घटनेमुळे मुंबईसह उपनगरात खळबळ उडाली असून संपूर्ण महाराष्ट्र हादरला आहे. याच घटनेवर समीरने भाष्य केलं आहे. समीरने त्याच्या इन्स्टाग्राम स्टोरीद्वारे या घटनेबद्दल तीव्र शब्दांत त्याचे मत मांडले असून यामध्ये त्याने असं म्हटलं आहे की, “वसईत एका मुलीचा तिच्या तथाकथित प्रियकराने दिवसाढवळ्या सर्वांसमक्ष निर्घृण खून केला. हे असं वारंवार होत असतं. भयानक आहे हे. पोलिसांचा आणि कायद्याचा धाक आहे का? मुर्दाड बघ्यांचं काय करायचं हे प्रश्न आहेतच’.
यापुढे त्याने असं म्हटलं आहे की,. “आता असं वाटत नाही का की शाळांमधून (मराठी, इंग्रजी, महानगरपालिका, खासगी किंवा इतर) सर्व ठिकाणी मानसशास्त्र हा विषय असायला हवा? मानसोपचार तज्ज्ञ/समुपदेशक बोलावून लहानपणापासून गोष्टी शिकवायला हव्यात? पालकांचेही वेळोवेळी सेशन्स व्हायला हवेत? मला तरी असं वाटतं, की याचा गांभीर्याने विचार करायला हवा. प्रयत्न तरी नक्कीच व्हायला हवेत”.
आणखी वाचा – अवघ्या २ दिवसांत सुरु होणार ‘बिग बॉस ओटीटी ३’, तिसऱ्या पर्वात ‘हे’ स्पर्धक होणार सहभागी, जाणून घ्या…
नालासोपारा येथे राहणारा रोहित यादव व आरती यादव या दोघांचे मागील सहा वर्षांपासून प्रेम संबंध होते. मात्र आरती अन्य मुलाशी बोलत असल्याचा रोहितला संशय होता. यावरून त्या दोघांमध्ये भांडणं होत होती. या भांडणातून रोहितने आरतीला अडवलं आणि दोघांची शाब्दिक बाचाबाची झाली. त्यावेळी रोहितनं आपल्याबरोबर आणलेल्या लोखंडी पान्याने तिच्यावर सपासप वार केले. या हल्ल्यात आरती गतप्राण झाली.
दरम्यान, वसईतील या हत्येप्रकरणी अनेकांनी सोशल मीडियाद्वारे संतापजनक पोस्ट शेअर केल्या आहेत. याप्रकरणातील आरोपी रोहित यादवला अटक करण्यात आली आहे. शिवाय गृहमंत्री देवेंद्र फडणवीस यांनी याप्रकरणात सखोल तपास करण्याचे आदेश दिले आहेत. सोशल मीडियावर या भयानक घटनेचा व्हिडीओ व्हायरल झाला असून कलाकार मंडळींसह नेटकऱ्यांच्या संतप्त प्रतिक्रिया उमटत आहेत.
