‘सातव्या मुलीची सातवी मुलगी’ मालिकेतून अभिनेत्री तितीक्षा तावडे घराघरांत पोहोचली. तितीक्षाच्या या मालिकेतील नेत्रा या भूमिकेमुळे तिला खऱ्या अर्थाने लोकप्रियता मिळाली आहे. अभिनयशिवाय तितीक्षा तिच्या वैयक्तिक आयुष्यामुळेही चर्चेत असते. सोशल मीडियावरही तितीक्षा बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात राहत असते. तितीक्षा चर्चेत आली होती ती तिच्या लग्नामुळे. तितीक्षाने अभिनेता सिद्धार्थ बोडकेसह लग्नगाठ बांधली. (Titeeksha Tawde On Siddharth Bodke)
तितीक्षा व सिद्धार्थच्या पारंपरिक अंदाजातील लग्नाने साऱ्यांचं लक्ष वेधून घेतलं. त्यांच्या लग्नाची बरीच चर्चा सोशल मीडियावर रंगलेली पाहायला मिळाली. अशातच तितीक्षाने तिच्या इन्स्टाग्राम अकाउंटवरुन शेअर केलेल्या एका पोस्टने साऱ्यांचं लक्ष वेधलं आहे. ही पोस्ट तिने तिचा नवरा सिद्धार्थसाठी केली आहे. सिद्धार्थ आगामी JNU या चित्रपटात महत्त्वपूर्ण भूमिका साकारताना दिसणार आहे. नुकताच या चित्रपटाचा ट्रेलर प्रेक्षकांच्या भेटीला आला. तितीक्षाने हा ट्रेलर शेअर करत तिच्या नवऱ्यासाठी खास शुभेच्छा दिल्या आहेत.
“तू माझा अभिमान आहेस सिद्धार्थ. मला माहित आहे की तु रुपेरी पडद्यावर जादू निर्माण करशील, कारण तुम्ही नेहमी असेच करता. माझं तुझ्यावर प्रेम आहे. २१ जूनपासून JNU सिनेमागृहात”, असं म्हणत तिने ही पोस्ट शेअर केली आहे. राजकीय परिस्थितीमध्ये ज्वलंतपणे भाष्य करणारा JNU सिनेमाचा ट्रेलर प्रेक्षकांच्या भेटीला आला आहे. ट्रेलरमध्ये असणारी काही वाक्य ही सध्याच्या राजकारणावर टोकदार भाष्य करणारी असल्याचं पाहायला मिळत आहे. ट्रेलरमध्ये मराठमोळ्या सिद्धार्थ बोडकेचा जबरदस्त अभिनयाने साऱ्यांचं लक्ष वेधून घेतलं आहे.
JNU च्या ट्रेलरमध्ये गंभीर विषय ज्वलंतपणे मांडण्यात आल्याचं पाहायला मिळत आहे. JNU सिनेमात सिद्धार्थ बोडके प्रमुख भूमिकेत असून याशिवाय उर्वशी रौतेला, पियुष मिश्रा, रवी किशन, विजय राज, रश्मी देसाई, सोनाली सेवगल, अतुल पांडे व कुंज आनंद हे कलाकारही झळकणार आहेत. विनय वर्मा यांनी JNU सिनेमाच्या दिग्दर्शनाची धुरा सांभाळली आहे. २४ जूनला सिनेमा संपूर्ण भारतात प्रदर्शित होण्यास सज्ज झाला आहे.