७०-८०च्या दशकात बऱ्याच अशा अभिनेत्री आहेत ज्या लहान वयातच सिनेविश्वात पदार्पण करत असत. बॉलिवूडमध्ये अशा अनेक अभिनेत्री आहेत ज्यांनी लहान वयातच लोकप्रियता मिळवली. अशीच एक अभिनेत्री जी वयाच्या १७व्या वर्षी बॉलिवूडमध्ये प्रसिद्धीच्या झोतात आली आणि तिने कमी वयात लग्न करण्याचा निर्णय घेतला. तिच्या चित्रपट कारकिर्दीत महत्त्वपूर्ण कामगिरी करत असताना, तिच्या वैयक्तिक आयुष्याने तिला खूप धक्के दिले आणि यामुळेच ती त्यात इतकी अडकू लागली की बाहेर पडण्याचा तिचा प्रयत्न प्रत्येक वेळी अयशस्वी ठरला. (Leena Chandravarkar)
लहान वयातच मोठ्या पडद्यावर दाखल झालेली लीना चंदावरकर ही वयाच्या २०व्या वर्षी बॉलिवूडच्या टॉप अभिनेत्रींच्या यादीत सामील झाली. त्यानंतर पुढच्या काही वर्षात ती ‘हमजोली’, ‘मेहबूब की मेहंदी’, ‘मंचली’ आणि ‘बिदाई’सारख्या मोठ्या हिट चित्रपटांमध्ये दिसली. लीनाचे वडील सैन्यात अधिकारी होते आणि अभिनेत्रीला लहानपणापासूनच चित्रपटांची आवड होती. त्यामुळे ती अभिनयाकडे वळली. लीना १९६७ मध्ये ‘मसिहा’ या चित्रपटातून चित्रपटसृष्टीत पदार्पण करणार होती, ज्यामध्ये तिच्याबरोबर सुनील दत्त होते, पण शेवटी तिने १९६८ मध्ये प्रदर्शित झालेल्या ‘मन का मीत’मधून चित्रपटसृष्टीत पदार्पण केले. हा चित्रपट खूप गाजला आणि लीना रातोरात स्टार बनली. त्यांनतर तिने काही चित्रपटांमध्ये काम केले आणि गोव्यातील राजकीय कुटुंबातील सिद्धार्थ बांदोडकरशी लग्न केले.
लीनाने तिच्या नवीन विवाहित जीवनाचा पुरेपूर आनंद घेण्याआधीच, लग्नाच्या एका वर्षानंतरच तिचा पती सिद्धार्थला एका दुःखद अपघातात आपला जीव गमवावा लागला. यानंतर लीना पूर्णपणे तुटली आणि नंतर हळूहळू किशोर कुमारशी जोडली जाऊ लागली. ती पुन्हा प्रेमात पडली पण त्यांच्या घरच्यांना हे नाते मान्य नव्हते. किशोरने यापूर्वी तीन वेळा लग्न केले होते आणि तो लीनापेक्षा २० वर्षांनी मोठा होता. लीनाच्या या निर्णयाला घरच्यांचा पूर्ण विरोध होता. लीनाने किशोर कुमारशी लग्न केले तेव्हा ती ३० वर्षांची होती आणि किशोर ५० वर्षांचा होता.
१९५१ मध्ये लीनाचा जन्म झाला तेव्हा किशोर कुमार यांनी रुमा गुहा ठाकुरता यांच्याशी पहिले लग्न केले. म्हणजे किशोर कुमारचे पहिले लग्न झाले तेव्हा लीना अवघ्या एक वर्षाची असेल. त्यानंतर दोघेही १९५८ मध्ये वेगळे झाले आणि किशोरने १९६० मध्ये मधुबालासह दुसरे लग्न केले. १९७६ मध्ये त्यांनी योगिता बालीशी लग्न केले आणि १९७८ मध्ये ते वेगळे झाले. त्यानंतर १९८०मध्ये लीना किशोरच्या आयुष्यात आली, पण हे नातेही अभिनेत्रीसाठी सुखावह नव्हते. १९८७ मध्ये किशोर कुमार यांचे निधन झाले आणि लीना पुन्हा एकदा वयाच्या ३७व्या वर्षी विधवा झाली. तिला किशोर कुमारपासून सुमित कुमार हा मुलगा झाला. प्रसिद्धीपासून दूर असलेली ही अभिनेत्री सध्या मुंबईत राहते.