Taarak Mehta ka ooltah chashmah : ‘तारक मेहता का उल्टा चष्मा’मध्ये ‘बाघा’ची भूमिका साकारणाऱ्या तन्मय वेकारियाचे वडील अरविंद वेकारिया यांचे जून महिन्यात निधन झाले. त्यांच्या निधनाने तन्मय पूर्णपणे कोलमडून गेला. तन्मयने सांगितले की जेव्हा त्याच्या वडिलांचे निधन झाले तेव्हा तो शूटवर होता आणि शूटिंग पूर्ण केल्यानंतरच तो त्याच्या वडिलांकडे हॉस्पिटलमध्ये गेला होता. वडिलांच्या निधनाची बातमी कळल्यानंतर दुःख पोटात घालून तन्मयने म्हणजे आपल्या सगळ्यांच्या लाडक्या बागाने शूटिंग सुरु ठेवलं. सेटवरचा त्याचा शूटिंगदरम्यानचा एक व्हिडीओही व्हायरल झाला. ज्यात शूटिंग संपल्यावर बागाला अश्रू अनावर झाले. आणि तो निर्माते असित मोदी यांच्याकडे ढसाढसा रडू लागला.
तन्मय वेकारियाने एबीपी न्यूजशी खास संवाद साधताना सांगितले की, आपल्या वडिलांची शेवटची इच्छा होती की जेव्हा आपला मुलगा शूटिंग करत असेल आणि त्यांच्या मृत्यूची बातमी समजेल तेव्हा त्याने शूट सोडू नये. त्याने त्याचे शूट पूर्ण करावे. तन्मयने वडिलांची शेवटची इच्छा अगदी चांगल्या प्रकारे पूर्ण केली.
जेव्हा त्याचे वडील अरविंद वेकरिया यांचे रुग्णालयात निधन झाले तेव्हा तन्मय त्याचे शूट करत होता. तन्मय वेकारिया यांनी सांगितले की, त्याचा मास्टर शॉट केल्यानंतर, नटू काकांची भूमिका साकारणाऱ्या किरण भट्ट यांनी तन्मयला हॉस्पिटलमध्ये सोडले. किरण भट्ट हे संपूर्ण वेळ तन्मयसोबत होते.
आणखी वाचा – देव आनंद यांच्या मुलाचे निधन, ७०व्या वर्षी घेतला अखेरचा श्वास, अविवाहित राहिले कारण…
किरण भट्ट हे तन्मय वेकरियाच्या वडिलांचे खूप जवळचे मित्र होते. अरविंद वेकरिया हे गुजराती थिएटरचे प्रसिद्ध अभिनेते आणि दिग्दर्शक होते. अरविंद वेकारिया यांनी अनेक दशके गुजराती रंगभूमीची सेवा केली. सशक्त अभिनेता असण्यासोबतच त्यांनी अनेक नाटकांचे यशस्वी दिग्दर्शन आणि निर्मितीही केली होती. तारक मेहता का उल्टा चष्मामध्येही त्यांनी छोटी भूमिका साकारली होती. शोमध्ये ते एका ज्वेलरी स्टोअरचे मालक बनले. ज्यांच्याकडे आत्माराम भिडे आपले दागिने गहाण ठेवण्यासाठी गेले होते.
तन्मयबद्दल बोलायचे झाले तर तो बऱ्याच दिवसांपासून तारक मेहता या शोमध्ये काम करत आहे. सुरुवातीला तो या शोमध्ये छोट्या भूमिका करत असे. त्याने ऑटो ड्रायव्हरची भूमिकाही केली होती. आता तो जेठालालच्या दुकानात काम करतो. नुकताच त्यांच्या प्रेमकथेचा ट्रॅक शोमध्ये दाखवण्यात आला. तारक मेहता या शोला २८ जुलै रोजी १८ वर्षे पूर्ण झाली. टीमने नुकताच एकत्र साजरा केला. या सेलिब्रेशनचे फोटो आणि व्हिडीओ सोशल मीडियावर व्हायरल होत आहेत.
