Asha Bhosle Passes Away : प्रसिद्ध गायिका आशा भोसले यांचे वयाच्या ९२ व्या वर्षी निधन झाले. त्यांच्या निधनाने एका युगाचा अंत झाला असून संपूर्ण चित्रपट-संगीत उद्योगाला मोठा धक्का बसला आहे. आशा भोसले यांना शनिवारी ११ एप्रिलच्या रात्री मुंबईतील ब्रीच कँडी रुग्णालयात दाखल करण्यात आले. त्यानंतर त्यांना हृदयविकाराचा झटका आल्याची बातमी आली. मात्र, आजीला प्रचंड थकवा आणि छातीत जंतुसंसर्ग होत असल्याचे नात जनाई भोसले यांनी सांगितले होते. डॉक्टर तिच्यावर उपचार करत असून ती लवकरच बरी होईल. यानंतर काल रविवार १२ एप्रिल रोजी त्यांनी अखेरचा श्वास घेतला. आज सकाळपासून त्यांचे पार्थिव राहत्या घरी अंत्यदर्शनास ठेवण्यात आले. तर शिवाजी पार्क येथे आता अखेर त्यांचे शेवटचे संस्कार करण्यात आले. अखेर आशा भोसले अनंतात विलीन झाल्या आहेत.
आशा यांच्या आत्म्यास शांती मिळण्यासाठी अनेकांनी प्रार्थना केली. त्यांना शेवटचे पाहण्यासाठी कलाकार, राजकीय नेते मंडळी आणि गायन क्षेत्रातील दिग्गज मंडळी उपस्थित असल्याचं पाहायला मिळालं. ठाकरे कुटुंब, सुप्रिया सुळे, राज ठाकरे, नीलम गोऱ्हे, आशिष शेलार ही नेते मंडळी त्यांना श्रद्धांजली वाहण्यास उपस्थित होती. इतकंच नाहीतर ए आर रहमान, अतुल गोगावले, अनुराधा पौडवाल, साधना सरगम, पॅपॉन ही गायन क्षेत्रातील मंडळी ही आशा यांच्या शेवटच्या दर्शनास पोहोचली. याशिवाय, तब्बू, रितेश देशमुख, उर्मिला मातोंडकर, जॅकी श्रॉफ, सुशांत शेलार, आशुतोष गोवारीकर, सचिन पिळगांवकर ही कलाकार मंडळी त्यांच्या अंत्यदर्शनास उपस्थित होती.
आशा भोसले यांच्यावर शासकीय इतमामात अंत्यसंस्कार झाले. आजवर त्यांनी त्यांच्या कारकिर्दीत अनेक उत्तम गाणी गायली. हिंदी व्यतिरिक्त तिने एकूण २० भारतीय आणि परदेशी भाषांमध्ये गाणी गायली आहेत. गायनासोबतच आशा भोसले यांनी अभिनयातही हात आजमावला. २०१३ मध्ये आशा भोसले यांनी ‘माई’ या मराठी चित्रपटात काम केले होते.
