‘चला हवा येऊ द्या’ फेम कुशल बद्रिकेने सगळ्यांना खळखळवून हसवत, सर्वांचं मनोरंजन करत आपल्या अभिनय कौशल्याने प्रत्येकाच्या मनावर राज्य केलं आहे. कुशल उत्तम अभिनेता तर आहेच शिवाय तो उत्तम लेखकही आहे असा म्हटलं तर वावगं होणार नाही. सोशल मीडियाच्या माध्यमातून तो त्याची लिखाणशैली प्रेक्षकांसमोर मांडत असतो. अभिनयाबरोबरच सोशल मीडियावर सक्रिय असणाऱ्या कुशलचा खूप मोठा चाहतावर्ग आहे. तो चाहत्यांबरोबर काही ना काही शेअर करत त्यांच्या संपर्कात राहत असतो.
स्वत:बद्दलचे काही फोटो व व्हिडीओ शेअर करण्याबरोबरच अभिनेता त्याच्या बायकोबद्दलही काही खास फोटो, व्हिडीओ शेअर करत असतो. अशातच त्याने त्याची बायको सुनयनाबद्दल एक मजेशीर पोस्ट शेअर केली आहे. कुशलने सुनयनाचा एक व्हिडीओ शेअर करत त्याखाली मजेशीर कॅप्शनही लिहिलं आहे. त्याने लिहिलेल्या कॅप्शनने सर्वांचे लक्ष वेधले जात आहे.
आणखी वाचा – रुपालीसह नेत्रालाही ऐकू आली ‘विचित्र वीणा’, हा देवीआईचा शुभसंकेत असेल की आणखी काही?, विरोचक सावध
कुशलची पत्नी सुनयनाही कथ्थक डान्सर असून या व्हिडीओमध्ये ती तिच्या डान्सचा सराव करत असल्याचे पाहायला मिळत आहे. हाताच्या बोटावर डान्सच्या स्टेप्स मोजत असताना ती “एक दोन तीन चार” असं म्हणत आहे. तिच्या याच कृतीचा व्हिडीओ कुशलने शेअर केला आहे आणि हा व्हिडीओ शेअर करत त्याने“यार…. एक दोन तीन चार पाच बोलायला रियाज कशाला हवा? पण मी मध्ये काही बोलत नाही उगाच आपला उपवास घडायचा” असं गंमतीने म्हटलं आहे.
दरम्यान कुशलच्या या पोस्टखाली त्याच्या अनेक चाहत्यांनी भन्नाट कमेंट्स करत या व्हिडीओला प्रतिसाद दिला आहे. एका नेटकऱ्याने “दादा, प्रयत्नही करु नकोस” असं म्हटलं आहे. तर आणखी एकाने “तू मध्ये न बोलण्याचा योग्य निर्णय घेतला आहेस” असं म्हटलं आहे. तसेच आणखी एकाने “उपवास की वनवास” असा मजेशीर प्रश्नही केला आहे.